Joserra Martinez de Nanclares: "Oso ongi aukeratu nituen olatuak txapelketa guztian, eta saria jaso nuen"
Joserra Martinez de Nanclares, ‘Txerra’; Bodyboarderra
Momentu honetan, Euskal Bodyboard Zirkuituko partaide zaharrena da Joserra Martinez de Nanclares; hala ere, gaztetxoei aurrea hartu eta Zurriolako txapelduna izan da.
Hamahiru urte zituenetik dabil bodyboarderrean Joserra Martinez de Nanclares Txerra (Gros, 1975), eta oraindik ere, jarraitzeko gogo bizia du. Hiru hondartzetan banatzen dute urtero euskal zirkuitua, eta Groseko bodyboarder beteranoa bigarren jardunaldiko onena izan zen. Asteburu honetan jokatuko dute zirkuituko azken lehia, eta irabazlea izan daiteke.
Nolatan hasi zinen bodyboardean?
Bodyboardean eta surfean aritzen ziren lagunak nituen; eta olatuak zeuden egun batean probatzera animatu nintzen. Paipo zahar bat utzi zidaten, eta jantzi handi bat, gerriko bat jarrita. Uretan sartu ninduten eta barrez hasi ziren, baina ni gustura ibili nintzen. Nire lagun batzuk surf denda batean lan egiten zuten, eta jantzia, taula eta hegalak lortuko zizkidatela esan zidaten. Orduan hasi nintzen, 13 urte nituela, eta ordutik jarraitzen dut. Azkenean, 25 urte eman ditut lehian; barrutik kendu ezin dudan sentimendu bat da.
Zein taldetan ibili izan zara?
Mori bugi taldean hasi nintzen. Gero, txapelketetan emaitza onak lortzen nituela ikusita, Mantan sartu nintzen; eta ondoren, Genesis, Hot bute, eta gaur egun, Arin Bodyboardsekin nabil.
Surfa gogoko duzu?
Surfean eta bodyboardean, bietan ibili izan naiz, baina erraztasun handiagoa dut bodyboardean.
Alde handia dago surfa eta bodyboardaren artean?
Olatuak hartzeko garaian erraztasun handiagoa dugu bodyboardean aritzen garenok, hegalak daramatzagulako. Surfeko taula luzeagoa da, baina besoekin lan asko egin behar izaten dute.
Euskal Zirkuituan parte hartzen ari zara, eta Grosen jokatutako jardunaldian txapelduna izan zinen. Gainera, Gipuzkoako txapelduna izan zinen.
Bai, aurten, Gipuzkoako Txapelketa kendu dute, eta Euskal Zirkuituko lehenengo lau gipuzkoarrak saritzea erabaki dute. Ezin gara kexatu, olatuak izan genituelako. Aurretik txapelketa bertan behera geratu behar izan da olatu faltengatik, baina oraingoan oso dibertigarria izan zen.
Egindako lanarekin gustura orduan?
Bai, oso gustura. Beti borrokan ibili naiz Aritz Larrinaga, Antonio Ortiz eta David Perezekin, beti izan baitira indartsuenak. Lehenengo postuetan ibili izan naiz beti; oraingoan, azkenean txapelduna izatea lortu dut, nire hondartzan bertan. Egia esan, izugarria izan da niretzat. Ander del Puertoren lana ere aipagarria izan zen, laugarrena geratu zen eta belaunaldi berriko kidea da.
Irabazteko helburua zenuen?
Txanda guztietara nire indar guztiarekin joaten naiz. Olatuak ongi aukeratzea eta ez erortzea garrantzitsua izaten da. Oso ongi aukeratu nituen olatuak txapelketa guztian, eta saria jaso nuen. Finala goizekoa baino zailagoa izan zen, haizea aldatu zelako, baina gauzak ongi atera zitzaizkidan.
Garaipena ospatzeko aukera izan zenuen?
Egun osoa uretan igaro ostean, oso nekatua nengoen. Afaldu eta ohera joan nintzen, baina izango dut hobeto ospatzeko aukera.
Txapelketako partaide zaharrena zinen?
Zirkuituan gabiltzan guztien artean, beteranoena naizela uste dut. Ni baino zaharragoak zirenak duela bi urte erretiratu ziren.
Poz handiagoa da gazteagoei irabazteko gai izatea?
Gazteen bodyboard belaunaldia oso indartsu datorrela ikusten dut, eta ni oraindik hor nago. Hor goian mantentzeak asko pozten nau eta bertan jarraitzeko lan gehiago egiten jarraitzen dut. Irabazten didaten egunean, beraiei ikusten gozatuko dut.
Hala ere, oraindik ere uretan jarraitzeko gogoz zabiltza, ez?
Asko animatzen naute, eta nirekin sartzen direnean jarraitzeko gogo handiagoa jartzen didate, berotu egiten nautelako. Txapelketek bizi handia ematen didate. Gogoan dut 2010ean lehiak utzi behar izan nituela, eta txapelketa batzuk ikustera ez nintzen joan, gaizki pasatzen nuelako. Hurrengo urtean oraindik ere gogo gehiagorekin itzuli nintzen.
Euskal Zirkuituan parte hartzen jarraituko duzu?
Bai, lehenengo postuetan nabil eta ea nola geratzen naizen. Jardunaldi bakarra falta da zirkuitua bukatzeko, eta datorren asteburuan izango da.
Beste txapelketaren bat duzu buruan?
Federazioari eta Zumaiako lagunei esker, aurten Europako Txapelketa egingo dute Zumaian bertan. Sekulako aukera izango da, eta ea lan ona egiten dudan. Urriaren 26tik 28ra izango da. Bestela, euskal zirkuituaz gain, Euskadiko Txapelketa jokatzen dugu, eta bertako lehia lokalak.
Inguruko txapelketetan parte hartzeaz gain, atzerrian lehiatzeko aukera izaten duzu?
Lehen txapelketa gehiago antolatzen zituzten atzerrian. Orain, Munduko Txapelketa etorriko da, baina horretarako Espainiako 24 bodyboarder onenen artean egon behar zara. Proba asko eta diru asko da, eta babesleak ez daude asko emateko moduan. Hawaiira edo Australiara joatea oso garestia da. Portugalera joan izan gara Europako Txapelketaren batetara, baina aurten Zumaiakoa bakarrik dagoela uste dut.
Erretiratzen zarenean, entrenatzaile izan nahiko zenuke?
Ba agian bai. Lehenago ere ibili izan naiz bodyboard eskolak ematen, baina lehen atera nuen tituluak orain ez dit balio. Federazioak ikastaroak prestatu ditu titulu berriak ateratzeko, eta ahal dudanean gustura egingo dut.
(Argazkia: Estitxu Zabala)
