Vasco de Camping elkartearen argazki lehiaketan parte hartzeko epea zabaldu dute
Vasco de Camping mendi elkarteak argazkilaritza lehiaketa antolatu du aurten ere, mendian eta naturan argazkiak ateratzea gogoko dutenentzat. Jose Alonso Labraren omenez antolatuko dute aurtengo lehia ere, eta argazkiak ateratzeko gaia mendiko ekintza da. Zehazki, mendiko kirolei dagokienean, ekintzari dagokion arloa lantzea nahi dute argazkien bidez, mendian lantzen den edozein kirol dela ere; esfortzua, ariketa, mugimendua…
Partaideen artean, lau sari banatuko dituzte, eta dirusaria eta oroigarri bana jasoko ditu irabazle bakoitzak. Partaide bakoitzak sei argazki bidali ditzake, urriaren 31 baino lehen. Ondoren, elkarteak argitaratzen duen Errimaia aldizkarian emango dute irabazleen berri, abenduan. Informazio guztia elkartearen webgunean kontsulta daiteke, edo 943 271 866 telefonora deituta.
