Teknologia berriak erabiltzea ohikoa bihurtu da udalbatzarrean (Argazkia: Nagore Koch).
Juan Karlos Izagirrek zuzendu ohi ditu udalbatzarrak, alkatea izateak eskaintzen dion eskumena dela eta. Igeldotarrak neurtzen ditu denborak eta markatzen ditu erritmoak, hitza hartzeko garaian udal bozeramaileen artean oreka mantentzeko.
Alkateak, baina, ezer gutxi egin dezake udalbatzarra egin bitartean sortzen den eztabaida paraleloan; hots, sare sozialetan izaten den mezu trukaketan. Hor ez dago gidaririk, oihanaren legeak agintzen baitu.
Zinegotziek gehien erabiltzen duten tresna Twitter da. Oposizioak pagotxa aurkitu du hartutako erabakiak arrazoitzeko edo burura etortzen zaion edozer gauza publiko egiteko; kritika zorrotzak luzatzeko, esaterako.
Honen harira, atzoko udalbatzarrean idatzitako tuit batean, PPko udal bozeramaile Ramon Gomezek PSE-EEren aurka egin zuen saioa hasi bezain pronto: «Lotsagarria iruditzen zaigu sozialisten jarrera; Bildu babestu dute Etxadiko lan taldea aldatzeko orduan, bertako zuloa estaltzeko».
PSE-EEko zinegotzi Enrique Ramosek, bere aldetik, Bilduko Josu Ruiz izan zuen jopuntuan: «Bilduko bozeramaileak, Urkulluk bezala, dena irakurtzeko estiloa du gustuko. Ez ditu begiak ere altxatzen paperetik… sendotasun eta pasio pixka bat ondo etorriko litzaioke». Beste tuit batean, Ramosek berak zein EAJko zinegotzi Aitziber San Romanek, Berpiztu elkartearen presentziaren berri eman zuten; elkartea udalbatzarrean izan zen, pertsona guztien elikagai eskubideen alde leloa zuten eskuorriekin.
San Romanek berak zergen eztabaidan zer egingo zuten aurreratu zuen: «Hiriarekiko ardurarekin bozkatuko dugu, ez udal gobernuak merezi duelako. Ez dira gerturatu ere egiten eztabaidatzeko».
Hauteskunde egunean ere
Horrenbestez, atzoko udalbatzarrak hiriko politikariek Twitter erabiltzeko ohitura dutela berresteko balio izan zuen. Bistan da teknologia berriak bere egin dituztela, lan tresna gisa erabili arte. Urrutira joan beharrik gabe, Eusko Legebiltzarrerako hauteskundeak zirela eta,
sare sozialak pil-pilean izan ziren joan den igandean.
