'Gure gaztetxoak itzultzaile handiak' tailerra, Badu Badan
EIZIEk eta Galtzagorri Elkarteak 10-11 urteko neska-mutilentzako itzulpengintza tailerra antolatu dute Badu Bada erakusketan: Gure gaztetxoak itzultzaile handiak. Patxi Zubizarretak eta Fernando Reyk jardungo dute gaztetxoekin lanean.
Bihar asteartea, izango da tailerra, 17:00etatik 19:00etara, San Telmo Museoan.
Tailerrean parte hartzeko aurrez eman behar da izena, Galtzagorri Elkartean, Galtzagorri@galtzagorri.org helbidera idatzita. Gehienez 20 lagunentzako lekua izango da, doan, eta izen-emate epea gaur bertan itxiko da.
10-11 urteko neska-mutilak gonbidatu dituzte ipuin bat itzultzera: Orejas de mariposa / Tximeleta-belarriak (Idazlea: Luisa Aguilar; Ilustratzailea: Andre Neves; Itzultzailea: Fernando Rey; Argitaltxea: Pamiela-Kalandraka). Patxi Zubizarreta idazle eta itzultzaileak saioa girotuko du, eta Fernando Rey itzultzaileak lanean jarriko ditu gaztetxoak: ipuinaren gaztelaniazko bertsioa pantaila batean dutelarik euskarara itzultzen lagunduko die.
