Etxe kaleratzeen aurkako protesta ugari
Gaur PPren egoitzaren aurrean elkarretaratzea egingo dute 18:00etan. Jose Eugenio Azpiroz PPko kidearen bulegoan egin behar zuten ‘escrache’-a debekatu egin zuen atzo Ertzaintzak.
Gipuzkoako Stop Kaleratzeak taldeak escrache informatibo bat egiteko asmoa zuen atzo arratsaldean Jose Eugenio Azpiroz PPko diputatuaren bulegoan, hari gutun bat emateko. Ekintza hasi baino bi ordu lehenago, ordea, Ertzaintzak debeku agiria bidali zion taldeari. Amara Berrin du Azpirozek abokatu bulegoa, eta 300 metro baino gutxiagora gerturatzea debekatu zieten. Ertzaintzaren debekua dela-eta Xabier Soto taldeko kideak hau esan zuen: «Gure ekintza guztiak indarkeriarik gabeak dira. Baina badirudi arriskutsuak garela». Taldeak helegitea aurkeztuko du, «ikusteko zein eskubide urratu diren: taldearenak ala Azpirozenak».
Mikel Sanchez Gipuzkoako Stop Kaleratzeak taldeko kideak azaldu du beren asmoa Azpirozi gutun bat ematea baino ez zela: «Etxerik gabe geratzen ari direnen errealitatea helarazi nahi genion, kontzientziaren arabera bozka dezan Hipotekak Eragindakoen Plataformak aurkeztutako herri ekinbide legegilea». Etxebizitzak ordainean emateko eta etxe kaleratzeak geldiarazteko eskatzen du ekinbide legegile horrek. Milioi eta erdi sinadura jaso ditu Hipotekak Eragindakoen Plataformak. Atzo gertatutakoa jaso du Berria egunkariak gaur.
Gaur ere protesta egingo dute Amara Berrin. Illunbe kalean elkartuko dira, PPren egoitzaren aurrean, eta elkarretaratzea egingo dute 18:00etan.
