Gazte auzipetuak: "Kostako zaie gu eramatea"
Larunbatean manifestazio batera deitu dute eta herri harresia eraikitzeko deia egin dute 9 auzipetuen alde.
Eleak mugimenduak deituta, prentsaurreko jendetsua egin dute atzo Auzitegi Gorenak epaia berretsi zien 8 gazteek. Bertan azaldu da baita ere 4 urteko kartzela zigorra ezarri zioten Ekaitz Ibero gaztea. Ekaitz Ibero absolbitu egin dute auzi honetan, baina, kale erasoak egotzita beste auzi batean zigortu zutenez, espetxeratzeko arriskuan da hura ere —kartzelara sartzeko eguna jarri zioten, baina ez zen joan—. Edozein unetan atxilotu ditzakete bederatzi lagunak.
Eleakeko kide Txerra Bolinagak azaldu du ez dela gertakari islatu bat: “gazte independentista askoren eguneroko ogia da”, esan du. Hala, larunbatean manifestazio batera deitu dute. Bulebarretik irtengo da 17:00ean.
Auzipetuek azaldu dute ez dutela sententzia “ez onartzen, ez zilegitzat hartzen”, eta prentsaurrekoan sententzia bera apurtu dute. Azkenik babesa eskertu, eta halako babesarekin ez direla berehalakoan kartzelara joango esan dute; “kostako zaie gu eramatea”, esan dute.
Aske gunea, aste osoan
Gazteei babesa erakusteko Donostiako herri mugimenduek Aske Gunea jarri dute Bulebarrean. Aste osoan egongo dira bertan hainbat ekimen antolatuz eta dei egin dute proposamenak zein ekimenak bertan egitera. Aske Gunea 9:00etatik 20:00etara egongo da zabalik egunero. Elkartasun gunean pasatuko dute eguna gazteek. Elkartasuna eta babesa emango die jendeak. Handik etxera joateko bidean lagunduko dituzte. “Desobedientzia zibila, erresistentzia pasiboa, muga horien baitan gazteak babestu behar diugu”.
Espainiako Auzitegi Gorenak Donostiako hamabost gazte auzipetuetatik zortzi zigortu zituen: Imanol Vicente, Nahikari Otaegi, Ekaitz Ezkerra, Aitor Olaizola, Adur Fernandez, Oier Lorente, Mikel Arretxe eta Egoi Alberdiri ezarritako zigorra berretsi zuen atzo. Beste zazpiak, aldiz, absolbitu egin ditu: Ekaitz Ibero, Igor Alvarez, Urko Pikaza, Asier Mariezkurrena, Unai Perez, Pello Lamarca eta Beñat Apalategi.