Musika Parkean ekimena apirilaren 20an abiatuko da, Aieten
Musika Parkean ekimenak, eta aurreko urteetako arrakasta ikusita, antolatzen jarraitzeko asmoz daude bultzatzaileak. Zehazki, Donostia Kultura eta Euskadiko Elkarte Filarmonikoak antolatzen dute Musika Parkean, eta aurtengo egitarauaren berri eman dute filarmonikako Xabier de la Mazak eta Donostia Kulturako Jon Aizpuruak, gaur egindako aurkezpenean. Apirilaren 20 egingo dute lehen saioa, Aieten, eta hilero saio bat antolatu dute irailera arte. Azken batean, ekimenaren helburua parkeak kultur aisirako gune moduan aldarrikatzea da; hala, musika, gastronomia eta ingurumena uztartzen dituzten jarduerak proposatzen dituzte. Azken batean, herritarrek parkeetako belardiak zapaltzea nahi dute, eta picnic baten bueltan musika kontzertuez gozatzea. Gainera, hilabete horietan hirian izaten diren beste ekimen batzuekin bat egiten du, Zinemaldia edo Jazzaldia, esaterako.
Aurreko urteetan, kontzertu bakoitzean 200-300 lagun biltzera iritsi direla adierazi du De la Mazak. “Iaz, swing dantza ikastaro bat antolatu genuen Miramar Jauregian, eta 2.500 pertsona etorri ziren, sekulakoa izan zen”, gehitu du De la Mazak. Oraingoz, apirileko saioko kontzertuen berri bakarrik eman dute. Hala ere, argi utzi dute euskarari presentzia handiagoa eman nahi diotela.
Saio guztiak irekiak eta doakoak izango dira, beraz, nahi duen guztiak atea zabalik du.
EGITARAUA:
Laugarren urtea beteko du
- Apirilak 20 (14:00/17:00): Aieteko Jauregiaren inguruko parkean. Donostiako Vanpopel eta Miarritzeko Dedicated Nothing. Vanpopel taldea Zuhaitz Gurrutxaga Realeko jokalari ohiak osatu du, eta pop rock estiloan aritzen dira. Abestien arteko tarteetan bakarrizketa txikiak eskainiko ditu Gurrutxagak berak. Dedicated, berriz, doinu gogorragoak eskaintzen dituen taldea da. Giza Eskubideen Zinemaldiaren baitan.
- Maiatzak 18 (14:00/17:00): Loiolako Benartegi baserriaren inguruan. Kontzertua erabaki gabe dago. Literaktum ekimenaren baitan.
- Ekainak 29 (19:30/22:30): Egiako parkean. Kontzertua erabaki gabe dago. Cristina Enea Fundazioaren Hidrologikoak ekimenaren baitan.
- Uztailak 20 (19:30/22:30): Antiguako Miramar jauregian. Kontzertua erabaki gabe dago. Jazzaldiaren baitan.
- Abuztuak 24: Ulian. Kontzertua erabaki gabe dago. Musika Hamabostaldiaren baitan.
- Irailak 21 (14:00/17:00): Ugull. Kontzertua erabaki gabe dago. Zinemaldiaren baitan.