Langileak Onkologikoaren aurrean, protestan. (Argazkia: K. M.)
Zerbitzua Osakidetzaren barnean hartzea nahi dute, Eusko Legebiltzarrak onartutakoaren arabera, hain zuzen.
Onkologikoko langileek protestak hasi dituzte zentroaren etorkizuna argitzeko eskatzen. Izan ere, abenduan Europe Oncology S. L. enpresak zentroaren kudeaketa hartu zuenetik ez dute oraindik aktuazio planaren berri, eta beraz, ez dakite zer etorkizun duen Onkologikoak.
Langile batzordeak eskatzen duena, Osakidetza barruan Onkologikoaren funtzionamendu eta zerbitzuen integrazio bat egitea da. Beraz, funtzionamenduari dagokionez, eta batez ere, gaixoei dagokienez, Osakidetza barruan egotea. Javi Beitia, enpresa batzordeko kideak azaldu duenez, “hau baita gipuzkoarrek bitarteko guzti hauek erabili ahal izateko modua”.
Ez dute eskatzen langileek funtzionario izaera izatea, baina bai zerbitzuak osasun publiko barruan egotea; “guk Eusko Legebiltzarrak esan zuenari eusten diogu eta hori bera betetzea nahi dugu”, azaldu du; zerbitzu publikoa ematea, alegia. Eusko Jaurlaritzak, bere esku dituen bitartekoak erabiltzea eskatzen dute. Argi utzi dute ez direla Donostia Ospitalearen konpetentzia, kolaboratzaile baizik.
Adostasuna, ez ekonomikoa bakarrik
Abendura arte hala zeudela azaldu du Beitiak, baina beti ere, kontzertu ekonomiko baten arabera. Orain eskatzen dute, hori bera ez bakarrik ekonomikoki adostea, baizik eta kontzertua gaixoen araberakoa izatea, hau da, Osakidetza eta Kutxak haien arteko akordio bat egitea, Osakidetzako gaixoak Onkologikora pasa ahal izateko.
Ez daude zuzenki arduratuta langileen etorkizunarekin, baina argi dute “gaixo gutxiago, lan gutxiago” izango dela. Gainera hainbat lanposturen “eraldaketak” eta murrizketak somatzen hasi direla azaldu dute, eta oraindik enpresa berriaren aktuazio plana ez dakitenez, beraien etorkizuna ere galdera ikur bat da langileentzat.
Kutxak bere asanblada egingo du ostegunean eta langile batzordea ere bertan izango da. Bitartean protestekin jarraituko dute. Elkarretaratzeak egingo dituzte egunero, 7:45ean eta 14:50ean. Guztira, 247 langile daude bertan lanean.