Añorgan herri lasterketa bat antolatu dute lehen aldiz

Estitxu Zabala

2013/06/13

Añorgako futbol zelaian hasi eta bukatuko da lasterketa. (Argazkia: Nagore Koch)

Añorgako triatloi taldeak antolatuta, herri lasterketa bat egingo dute lehen aldiz auzoan; Añorgako I. Herri Krosa. Zehazki, uztailaren 6an izango da lehia, 10:00etan, eta partaideek hiru itzuli eman beharko dizkiote hiru kilometroko ibilbideari. Lasterketak Añorga Txiki, Añorga eta Errekalde auzoak igaroko ditu. Lasterketaren hasiera eta bukaera Añorgako futbol zelaian izango dira. “Ibilbidea laua eta erosoa da, beraz, ez dago parte ez hartzeko aitzakiarik”, diote antolatzaileek lasterketarako deialdian. Gaztetxoek ere euren lehia izango dute. Hala, 9:30ean, alebin eta haur mailako lasterketak jokatuko dituzte; 800 metro eta 1’5 kilometroko luzerakoak, hurrenez hurren. Izen ematea Kirolprobak webgunean eta Añorga Kultur eta Kirol Elkartearen bulegoan egin daiteke. Añorga KKE-ko bazkideek ez dute izen ematea ordaindu beharko, gainontzekoek, berriz, 3 euroren truke egin dezakete izen ematea aldez aurretik. Lasterketaren egunean bertan, izen emateak 5 euro balioko du.