(Bideoa) Erritmo tropikalek piztu dituzte Zipotz jaiak
http://youtu.be/7XCY2dcsXa0 Gazteek Kuadrillen eguna ospatu dute, eta erritmo zein mozorro tropikalekin jantzi dute Gros.
Tomax Gaztelu jai batzordeko kidea omendu dute, auzoaren alde egindako lanagatik.
Txofre plaza lepo bete da Groseko jaiei hasiera emateko. Patxin eta Potxin pailazoak hasi dira giroa berotzen, eta plazan bildutako haur guztiak dantzan jarri dituzte. Buruhandi, erraldoi eta dultzaineroak lagun iritsi dira Zipotz eta Legami, jaietako protagonistak. Oholtza gainetik garai zailenetan ere jaietaz gozatzera deitu dituzte auzotarrak: “Inoiz baino gehiago”.
Txupina piztu ondoren, jai batzordeko kide bat omendu dute. Tomax Gaztelu auzotarrak Grosen alde egindako lana aitortu du jai batzordeak. Gazteluk ezin izan du joan, eta haren semeak hartu du hitza omenaldian, hunkituta. Donostiako jai herrikoien koordinakundeko kidea ere bada Gaztelu. Datozen urteetan ere auzoaren alde lan egiten duten eragileak edo auzotarrak omenduko dituztela adierazi dute jaietako antolatzaileek.
Gazteek Kuadrillen eguna ospatu dute, eta erritmo zein mozorro tropikalekin jantzi dute Gros. Eztarriak mojitoekin bustita kamioi bira egin dute auzoan zehar, Dantza egiten duen auzoa ez da inoiz hilko leloarekin. Sinkua drila, Ardi Galduak eta Errape kuadrillak izan dira dantzan kalez kale.
Kamioiak pintxo poteak erakarritako jendetzarekin egin du topo, eta asko harrituta geratu dira kamioia eta mozorrotutako kuadrillak ikustean. Katalunia plazan jarraitu du festak, Revolutionary Brothers-en emanaldiarekin.
-
- Zipotz haur batekin solasean. (Argazkia: N.Lizarralde)
-
- Tomax Gazteluren semea, haren aitari egindako omenaldian. (Argazkia: N. Lizarralde)
-
- Sinkua drila kuadrillakoak Txofre plazan. (Argazkia: N. Lizarralde)
-
- Ardi Galduak kuadrillakoak kamioi biraren atzetik. (Argazkia: N. Lizarralde)
-
- Mozorro eta karroza tropikalak egin dituzte Groseko kuadrillek. (Argazkia: N. Lizarralde)
-
- Kamioi bira egin dute auzoan. Irudian, Segundo Izpizua kalean. (Argazkia: N. Lizarralde)
