Hip-hip Urri! egitasmoaren aurkezpena. (Argazkia: Lide Ferreira)
Donostia 2016ren eskutik eta Donostia Kultura eta hiriko hainbat museo eta kultur erakunderen laguntzarekin batera, Ikertze kultura-elkarteak
Hip-hip Urri! egitasmoa antolatu eta koordinatu du. Bereziki 6 eta 14 urte bitarteko haurrei eta horien familiei zuzendutako dago eta familian kulturaren kontsumoa sustatzeko helburua du. Guztira, 58 jarduera egingo dira urriko asteburuetan zehar, Donostiako 21 kultur gunetan eta haurrentzako jarduera eskaintza doakoa izango da.
Egitasmoa azaltzeko, prentsaurrekoa eman dute gaur goizean, eta bertan izan dira, Juan Karlos Izagirre Donostiako alkatea, Naiara Sampedro Kultura zinegotzia, Amaia Almirall Donostia Kulturaren zuzendari-kudeatzailea, Blanca Zaragueta Ikertze Kultur Elkartearen ordezkaria, eta Fernando Bernues Donostia 2016ren zuzendari artistikoa.
Haurrak elkarlanean. (Argazkia: Ikertze)
“2016a baloreetan oinarrituta dago eta ekimen honetan horietako batzuk islatzen dira”, adierazi du Juan Karlos Izagirrek. Horien artean, kulturarekin hizkuntzaren bidez iristen ez garen lekuetara iristeko eta beste kulturak ezagutzeko aukera azpimarratu ditu. Naiara Sampedrok
Hip-Hip Urri! proiektuak bi alor lantzen dituela azaldu du. Alde batetik, kulturarekiko sentsibilitatea; eta, bestetik, aisialdia familian partekatzeko aukera, hau da, eskolatik haratago dagoena ezagutu eta bizitzeko aukera eskaintzea, hiria hobeto ezagutuz. “Hiri honek eskaintza aberatsa du kulturan”, nabarmendu du Amaia Almirallek eta horixe eskainiko dute hilabete honetan zehar: arte-lantegiak, antzerkia, erakusketak, zinema eta bisita gidatuak, besteak beste. Informazio gehiagorako, egitaraua
hemen kontsultatu eta deskargatu daiteke.
October Children 2011. urtean Holandan sortutako proiektua da eta Europako beste hiri batzuetan arrakasta handia izan du. Honekin lotuta, Fernando Bernuesek denboran hazkunde “izugarria” izango duen egitasmo bat dela adierazi du.
