Hamar urte isilik egon eta gero, 'Astiro' diskoa kaleratu du Urtzek
http://youtu.be/QFQOpVmO0HM Hamar urteko isilunearen ondoren, 'Astiro' diskoarekin itzuli da euskal taldea.
Pasaian sortu zen Urtz taldea, duela 25 urte. Taldekide askok, ordea, Donostia izan dute bizitoki, eta horregatik izan da IRUTXULOKO HITZA Astiro disko berriaren aurkezpenean. Momentu oso berezia bizi dutela aitortu dute; hamar urte dira agertokietatik jaitsi eta zaleengandik agurtu zirenetik, ustez, betiko. Berriz elkartu dira, taldea sortu zenean bezala, musika gustuko dutelako eta elkarrekin gustura daudelako.
Ritxi Aizpuru Baga-Biga diskoetxeko arduradunaren hitzetan, disko «rockeroa» da. Hamar abesti bildu dituzte taldearen zazpigarren disko honetan. Urtzen betiko esentzia gordetzen dute kantek, taldearen hasierako heavy eta rock doinuak nabari dira noski, baina Aizpuruk azaldu du estilo asko jasotzen dituela lan berriak, eta oro har erritmo kutsakor eta dantzagarriak direla nagusi.
Abesti berriak oholtza gainean estreinatzeko gogotsu daude taldekideak, eta betiko zaleak ere asebetetzeko prest daude, Urtzen ibilbideko klasikoak ere joko dituzte eta. Diskoa aurkezteko lehen kontzertua Durangoko Plateruenan emango dute, abenduaren 7an. Donostian urtarrilan izango dira zuzenean, nahiz eta oraindik emanaldiaren data zehatzik ez duten eman. Donostian Aste Nagusian Saguesen jotzeko gogoa dutela aitortu diote IRUTXULOKO HITZAri.
Aquariumen aurkeztu dute Astiro disko berria. Zergatik Aquariumen? Ba bertan bildutako kazetari eta argazkilariak harrituta utzi dituzte, izan ere, Victor Arguelles taldekidea Auditorioko arrainontziaren barruan agertu zen. Urpean erakutsi zuen Urtz taldearen bilduma, irudian ikus daitekeen moduan.
Urtz taldeko Josu Ariztegi, Xabier Camarero eta Iñigo Cousillas eta Baga Bigako Ritxi Aizpuru; arrainontzian, Victor Arguelles taldekidea Astiro diskoarekin, Donostiako Aquariumean atzo egin zuten aurkezpenean. (Argazkia: Lide Ferreira)
