'Berriro eta behin, Euskara dela eta Txillardegi gogoan' liburua idatzi du Joxe Austin Arrietak

Estitxu Zabala

2013/12/18

Joxe Austin Arrieta, 'Berriro eta behin'

Joxe Austin Arrietak ‘Berriro eta behin’ liburua aurkeztu du. (Argazkia: E. Zabala) E. Zabala

Joxe Austin Arrieta donostiarrak bizi osoa darama euskararen eta euskal kulturaren inguruan lanean. Gaurkoan, Berriro eta behin, Euskara dela eta Txillardegi gogoan liburua aurkeztu du, Txalaparta argitaletxearen eskutik. Liburuaren hitzaurrea Joxe Azurmendik osatu du, eta ondoren, bi zatik osatzen dute lana: Batetik, HUHEZI fakultatearentzat euskal kulturgintza modernoaren transmisioaz egindako hitzaldian oinarritutakoa, eta bestetik, Euskaltzaindiarako egindako Jose Luis Alvarez Enparantza Txillardegi hil berri txostenean oinarritua; biak ere Arrietak berak egindakoak. “Ez dut uste ideia berriak plazaratu ditudanik, gure hizkuntzaren osasunaren eta biziraupenaren inguruan egindako ikerketaren laburpen bat da, nire irakurketa eginez. Askok esandakoak bildu ditut. Espero dut, euskara txukunean”, aipatu du Arrietak aurkezpenean. Momentu honetan euskararen egoeraren inguruan Arrietak berak ere ez daki zein irakurketa egiten duen, itxaropentsu edo etsipen sentimenduak dituen adierazteko. “Ez dakit nire burua baikor edo ezkor ikusten dudan”, aipatu du egileak. Adibidetzat jarri du, igandean Bertsolari Txapelketa Nagusiaren finalean BEC beteta ikustea, esaterako, hizkuntzaren osasun onaren adierazle izan daitekeela. Hala ere, “euskaldunok ez gara inoiz ados jartzen”, azpimarratu du behin eta berriro. Azken batean, argi utzi du, denok kontuan izatekoa dela euskara ez dela gugandik dagoen zerbait, “euskara gugan dago”.

Azken bideoak