Bisitarientzat atea zabaldu du Eskulangintza Azokak, urtarrilaren 5a arte

Estitxu Zabala

2013/12/18

Gabonetako erosketak egiteko leku egokia izango da 40. urtez Errege Katolikoen kalean jarri duten karpa. Bertan, 35 artisauen denetariko sorkutzak topa daitezke, arropa, bitxiak, jostailuak…

Eskulangintza Azokaren aurkezpena egin dute gaur goizean (Argazkia: E. Zabala)

Artisauen lana goraipatu nahi izan dute 40. Eskulangintza Azokaren aurkezpenean. Urtero legez, Errege Katolikoen kalean jarritako karpa batean hartu du aterpea azokak, Koldo Mitxelena Kulturunearen ondoan; eta gaurtik urtarrilaren 5a arte egongo da zabalik. “Ederki girotzen ditu jai egunak eta hitzordu finko bilakatu da. Urtez urte sendotu egin da eta globalizazioaren garai honetan beharrezkoa da bertako kulturaren adierazle gisa. Eskuz egindako pieza errepikaezinak sortzen dituzte”, aipatu du Nerea Txapartegi udaleko Kultura ordezkariak. Guztira 35 artisau postuk osatzen dute azoka, eta ia denetik topa daiteke bertan: arropa, bitxiak, larruzko oinetakoak, egurrezko jostailuak, larruzko kartelak eta poltsak, xaboi naturalak, beirazko apaingarriak… Gainera, Euskal Herriko zein Katalunia edo Galiziatik hurbildutako artisauak biltzen ditu. 10:30etik 14:00etara eta 16:30etik 20:30era bisitatu daiteke azoka. Azokaren barnean, Euskal Herriko jantzi tradizionalen erakusketa txiki bat jarri du Iruñeko Texartu taldeak, abenduaren 27a arte. Ondoren, abenduaren 28tik urtarrilaren 5a bitartean, Durangoko Unzueta artisauek jarriko dute euren erakusketa. Gainera, hainbat tailer egingo dituzte bisitariei begira, batzuk erakustaldiak egiteko izango dira, eta beste batzuk, aldiz, haurrek parte har dezaten.