Ernesto Gasco: "Izagirre dagoeneko ez da donostiarra"

Agurtzane Altuna

2013/12/18

PP eta PSE-EEko ordezkariek elkarrekin egin dute agerraldia. (Argazkia: PSE-EE)

PP eta PSE-EEko ordezkariek elkarrekin egin dute gaur agerraldia. Izan ere, iritzi bera dute Foru Aldundiak Igeldori onartu dion herri izaeraren inguruan: guztiz gaitzesten dute erabakia. Udal ordezkariei dagokienez, berriz, EAJren “erreakzio falta” eta alkatearen jarrera salatu dituzte. Zentzu horretan, “Igeldotarra da, beraz, Izagirre dagoeneko ez da donostiarra”, esan du Ernesto Gasco, PSE-EEko bozeramaileak. Bi alderdiek Izagirreren dimisioa eskatu dute. “Gutxiengo baten iritziari bakarrik jarraitu, eta hiria zatitu dute, gehiengoaren iritzia kontuan hartu gabe”, gaineratu du Gascok. Donostiak gobernu aldaketa bat behar duela nabarmendu dute, eta EAJri “arduraz” jokatzeko eskatu diote. “Jeltzaleek dute udal gobernua aldatzeko giltza. Bilduk gobernuan jarraitu nahi badu EAJren babesarekin, egin dezala, baina ez Donostia zatitu duen pertsona buru duela”, esan du Gascok. PP eta PSE-EEk biharko udalbatzarrerako aurkeztu zituen erakunde adierazpen eta mozio guztiak atzera bota dituzte. “Benetan garrantzitsuena Igeldo da; Igeldoren inguruan hitz egin nahi dugu”, esan du Gascok. Ez badute hala egiten, udalbatzarrak aurrera jarraitzen badu, udalbatzarra utzi eta aretotik aterako dira, protesta gisa.

Azken bideoak