"Mari Domingi etorri da!"

http://youtu.be/ASPoKrPvzA0

Lide Ferreira

2013/12/18

Etxeko txikienak irrikaz egon arren, oraindik astebete falta da Olentzero etortzeko. Hala ere, azken honen laguntzailea den Mari Domingi Donostiako hainbat ikastetxetan izan da eta gaurkoan bere azken bisita Egia auzoko Aitor Ikastolan egin du. Bi eta sei urte bitarteko haurrak urduri sartu dira ikasgelara. Mari Domingiren zain zeuden, atzo ikusi zuten bideo batean eta gaur etortzekoa zela esan zuen. Horretarako, oihu egin behar izan dute eta gelako atetik sartu denean, zoramena piztu da. “Mari Domingi etorri da!”, esaten zuten. Olentzoro nola ezagutu zuen kontatu du eta askok istorioaren zati batzuk dagoeneko buruz zekizkiten arren, haurrek aho zabalik entzun dituzte Olentzeroren laguntzailearen hitzak. “Bakar bakarrik bizi nintzen eta dirurik ez neukanez, herrira joan behar izaten nuen, lan desberdinak egiteko. Herrikoek nitaz far egiten zuten gona zahar bat neramalako. Gau batean, ohera nindoanean Olentzero entzun nuen eta eskatu zidan herriko umeei opariak eramatea laster joango zela esateko. Honela, egun batean agertu zen eta opariak bizkarrean zituela, goxo-goxo afaldu eta gero, elkarrekin banatu genituen opariak. Amaitu genuenean, opari bat falta zen. Nirea. Gona gorri berri bat oparitu zidan eta orduztik batera bizi gara mendian”.

Mari Domingi Aitor Ikastolako haurrei istorioa kontatzen. (Argazkia: Lide Ferreira)

Mari Domingik istorioarekin amaitu duenean, zintzoak izan direla eta dagoeneko gutunak idatzi dituztela ziurtatu dute. Bisita amaitzeko, tratu bat egin dute: “Abesten badidazue, gozokiak emango dizkizuet”, esan du Mari Domingik. Eta horrela egin dute, Kas kas abestuz bisita eskertu diote eta gutxinaka-gutxinaka umeak euren ikasgeletara joan dira. Aitor Ikastolan azken bisita egin du, baina oraindik badira beste batzuk. Izan ere, jarraian agertzen diren Haur Txokoetan ere izango da Mari Domingi. [box] MARI DOMINGI HAUR TXOKOETAN

Abenduak 18, asteazkena

– Egiako Haur Txokoa. 17:30.

– Groseko Haur Txokoa. 18:30.

Abenduak 19, osteguna

– Amarako Haur Txokoa. 17:30. – Martuteneko Haur Txokoa. 18:30.

Abenduak 20, ostirala

– Doka. 17:30.

Abenduak 22, igandea

– Aieteko Haur Txokoa. 17:00. [/box]