2014ko udal egutegiaren aurkezpena. (Argazkia: Donostiako Udala)
Egutegiak agortu arte banatuko dituzte. Udaletxean eta Okendo, Ernest Lluch, Egia eta Casares-Tomaseneko kultur etxeetan ostiral goizean egingo dute banaketa, 10:00etatik aurrera. Aiete, Lugaritz, Loiola, Larratxo, Larrotxene eta Intxaurrondoko kultur etxeetan, berriz, arratsaldean egingo dute banaketa, 16:00etatik 20:30era.
2014ko udal egutegiak lankidetzari egin nahi izan dio keinua. Hala, Donostiako Udaleko Lankidetza atalak mundu zabalean bultzatzen dituen proiektuei erreferentzia egin nahi izan diete zeharka, hainbat herrialdetako pertsonak kokatuz hirian. Juan Karlos Izagirre Donostiako alkateak adierazi duenez, “egutegiak helburu bikoitza du, datorren urteko egutegia ezagutzea, noski, baina Donostia munduari begira ere badagoela erakustea: beste herriei, beste kulturei, beste errealitateei, beste pertsonei… Eta begirada hori ez da elkartasun kontu hutsa; mundu bidezkoago bat aldarrikatu nahi dugu egutegiaren bidez”.
Zentzu horretan, Udalak Lankidetza atalaren bidez egiten duen lana nabarmendu du Izagirrek; “Lan isil hori da islatu nahi izan duguna, ikusiarazi nahi izan duguna, eta, bide batez, gobernuz kanpoko erakundeek egiten duten lana aitortu”, esan du.
Gobernuz Kanpoko Erakundeek utzitakoak dira argazki gehienak. Hala, jatorrizko herrialdeetako argazkiak Donostian txertatu dituzte, “errealitate horiek hemengoak ere badirela” aldarrikatzeko. Mali, Pakistan, India, Tibet, Mendebaldeko Sahara, Nigeria, Palestina, Guatemala, Kenya, Ruanda eta Boliviako herritarrak agertzen dira. Eta hilabete bakoitzean irudiarekin lotura duen esaldi bat txertatu dute. Tartean Leon Tolstoi, Ghandi, Gioconda Belli, Nelson Mandela, Rigoberta Menchu eta Eduardo Galeanoren pasarte batzuk.
Gipuzkoako Argazkilarien Elkartea
Gipuzkoako Argazkilarien Elkarteko Jose Luis Garcia Madinabeitia argazkilariak egin du muntaketa. Bere lana deskribatuz, “argazkietan ageri diren pertsonak duintasunez tratatzea izan da lehentasuna, bere testuingurua gurera ekarriz. Jatorrizko irudiak ikusi eta non kokatu erabakitzea izan da aurreneko pausoa, gero bertan argazkia egin eta ondoren bi irudiak uztartu dira”, esan du Madinabeitiak.
Gizarte ereduaren aldaketa
Jon Albizu, Lankidetza zinegotziak, egutegiaren bidez justizia sozialarekiko konpromisoa islatu nahi izan dela adierazi du, eta une honetan garatzen ari diren proiektuen berri ere eman du. Bederatzi proiektu babesten dituzte India, Peru, Bolivia, Palestina, El Salvador, Kolonbian eta Saharan. Gizarte ereduaren aldaketa ere aldarrikatu du Albizuk: “Beste errealitate batzuetara gerturatu behar dugu, hausnarketa egiteko, justizia soziala aldarrikatzeko eta beste gizarte eredu bat gauzatzeko. Egutegiaren izenburuak dioen bezala,
Zerbait aldatu beharra dagoelako. Izan dadila 2014 urte mugarri bat bide horretan”, esan du Albizuk.
