Reala Kopako final-zortzirenetan da, Algeciras jipoitu eta gero (4-0)

Aritz Sorzabal

2013/12/18

Carlos Vela. (Argazkia: Realsociedad.com)

Realak Espainiako Kopako madarikazioa uxatu du behingoz, talde donostiarrari zegokion lehen kanporaketa gainditu eta gero, Algeciras bidean utzita. Joaneko partidan 1-1eko berdinketa lortu zuten txuri-urdinek Nuevo Mirador estadioan, Algecirasen; horrenbestez, atea hutsean mantentzearekin nahikoa zuten final-zortzirenetarako txartela eskuratzeko, etxetik kanpo lortutako golen balio bikoitza dela eta. Jagoba Arrasateren jokalariek, baina, partida irabazi dute (4-0), ez dira berdinketarekin konformatu. Norgehiagoka ez da ikusgarria izan, baina Realak egin beharreko lanak egin ditu. Lehen zatiaren bukaeran iritsi da donostiarren lehen gola, Jabi Rosen bitartez, areaz kanpo lortutako gol bikain bati esker. Handik minutu gutxira, 45. minutuan, andaluziarrek berdintzeko aukera izan dute, baina ez dute asmatu. Hor amaitu dira kanpotarren aukera guztiak, bigarren zatian Realak kontrolpean izan baitu norgehiagoka. Hain zuzen ere, Jose Angelen jokaldi txukun baten ondoren etorri da Realaren bigarren gola. Kasu honetan, Seferovicek egin du, 66. minutuan. Jokoz kanpo egon zitekeen jokaldi honetan. Erabakiak erabaki, minutu gutxi geroago, 70. minutuan, Griezmannek bidali du berriro baloia sareetara. Golak ez dira hor amaitu. Izan ere, festak 75. minutuan izan du jarraipena; Carlos Velaren bitartez, kasu honetan. Buruz egin du. Garaipen honekin, Reala Kopako final-zortzirenetan izango da. Aurkaria zein izango den badaki dagoeneko; Vila-real izango da. Urtarrilaren 8an izango da joaneko partida eta urtarrilaren 15ean, itzulerakoa.