2013a iruditan: ozen hitz egin dute herritarrek
http://youtu.be/s6vv7gsXvOE Igeldotarrek, errauste plantaren aurkakoek, uholdeek kaltetutako auzotarrek, langileek, Karlos I.aren saihesbidearen inguruan bizi diren auzotarrek, gazte auzipetuek... hainbat eragilek berea defendatu dute 2013an. IRUTXULOKO HITZAK urteko albiste nagusiak jaso ditu urtekarian. Autobus geltokiko lanak abian jarri dituzte Atotxan, Metroaren proiektua eten dute, Munto baserria eraitsi dute, udalbatzak argi berdea eman dio estadio berriaren proiektuari... Bideo honetan albiste horien laburpena ikus dezakezu, iruditan.
Igeldotarrek, errauste plantaren aurkakoek, uholdeek kaltetutako auzotarrek, langileek, Karlos I.aren saihesbidearen inguruan bizi diren auzotarrek, gazte auzipetuek… hainbat eragilek berea defendatu dute 2013an. IRUTXULOKO HITZAK urteko albiste nagusiak jaso ditu urtekarian. Autobus geltokiko lanak abian jarri dituzte Atotxan, Metroaren proiektua eten dute, Munto baserria eraitsi dute, udalbatzak argi berdea eman dio estadio berriaren proiektuari… Bideo honetan albiste horien laburpena ikus dezakezu, iruditan.
2009an desagertutako Jon Anza intxaurrondotarraren kasua argitu gabe itxi dute. Hiru urteko prozeduraren ondotik, Tolosako (Okzitania) epaileak Jon Anzaren desagertzea eta heriotza argitzeko kasua ixtea deliberatu zuen uztailean, eta ondoriorik gabeko kasu gisa sailkatzea eskatu. Intxaurrondotarraren heriotza naturala izan zela dio epaileak. Disfuntzionamendu nabarmenak izan direla aitortu du, baina ez du ikertu.
Maiatzaren 30ean greba orokorra egin zuten Donostian. Hain zuzen ere, ELA, LAB, CNT, ESK, STEE-EILAS, CGT, EHNE eta HIRU sindikatuek deituta, eta hainbat eragilek babestuta, greba eguna egin zuten Hego Euskal Herrian; krisia hasi zenetik seigarren greba orokorra izan zen, hain justu. Euskal gehiengo sindikalak babestutako protestak eragin handia izan zuen Donostian, zenbait lekutan lanean jarraitu zuten arren.
Desobedientzia mugimendu ikusgarria egin zuten apirilean Bulebarrean. Segi “talde terroristako” kide izatea leporatu eta seina urteko espetxe zigorra ezarri zieten auziperatuta zeuden hamabost gazteetatik zortziri. Imanol Vicente, Nahikari Otaegi, Ekaitz Ezkerra, Aitor Olaizola, Adur Fernandez, Oier Lorente, Mikel Arretxe eta Egoi Alberdi zigortu zituzten. Absolbituen artean, Ekaitz Ibero. Halere, kale borroka ekintza batean parte hartu izana leporatu zioten, eta hura ere atxilotu egin zuten. Edozein unetan preso har zitzaketela jakitun, Askegunea antolatu zuten Bulebarrean.
Urrian, berriz, astebeteko epean hiru prozedura judizial hasi ziren, eta 33 donostiarren kontrako epaiketak hasi ziren. Lehen epaiketa Donostiako epaitegian izan zen; 2009ko hauteskunde autonomikoetan legez kanporatzea salatu eta parte hartzeko eskubidea al-darrikatzeagatik 24 donostiar epaitu zituzten. Madrilgo Auzitegi Nazionalean izaten ari dira beste bi epaiketak. Segiko kide izatea egotzita Garazi Rodriguez, Asier Coloma, Mikel Eskiroz, Maialen Eldua, Eihar Egaña eta Aitziber Arrieta epaitzen ari dira. Herriko tabernen aurkako epaiketan, berriz, Juani Lizaso, Joseba Alvarez eta Agus Rodriguez deitu dituzte deklaratzera. Jopuntuan Antiguotarrak, Hontza, Illunki, Herria eta Marruma elkarteak daude.
1813ko abuztuaren 31ko sarraskiaren bigarren mendeurrena ekarri dute gogora aurten. Gertakari lazgarri horien ondorioz, agintariak Zubietan bildu ziren duela 200 urte, hiria berreraikitzeko hitzarmena sinatzeko.
Albiste bikainak izan dira kirol arloan. Bera Bera Eskubaloiak balentria egin du Liga, Kopa eta Superkopa irabazita, eta Realeko belar hockey taldeko neskak Ligako txapeldun izan dira. Reala, berriz, Txapeldunen Ligara itzuli da. Albiste hauek eta gehiago berreskuratu ahal izango dituzu IRUTXULOKO HITZAren urtekarian.
