Agintariek eta herritarrek bat egin dute udaletxe aurrean egindako elkarretaratzean

Aritz Sorzabal

2014/01/10

Alderdi Ederren egindako elkarretaratzea. (Argazkia: Aritz Sorzabal)

Guardia Zibilak hainbat lagun atxilotu zituen asteazken arratsaldean, Euskal Preso Politikoen Kolektibo-ko mintzakideen kontrako operazio baten baitan; hiru donostiar, tartean. Mobilizazio ugari egin dira azken orduetan; azkena udaletxe aurrean izan da, Alderdi Ederren, gaur eguerdian. Herritar asko hurbildu dira elkarretaratzera, baita hainbat agintari ere, Konponbideari erasorik ez! leloarekin. Gipuzkoako ahaldun nagusi Martin Garitano, Donostiako udal gobernuko zinegotzi Ricardo Burutaran, Axier Jaka eta Jon Albizu, Sortuko Donostiako koordinatzaile Joseba Alvarez eta EH Bilduko legebiltzarkide Rebeka Ubera bertan izan dira, besteak beste. Hain zuzen ere, Rebeka Ubera legebiltzarkideak berak hartu du hitza elkarretaratzearen amaieran, eta Espainiako Gobernua bere bitarteko guztiak erabiltzen ari dela salatu du, beti ere gatazka politikoaren “konponbidea oztopatzeko”. Uberaren arabera, “benetan larria” izan da polizia operazioa eta, Estatuak “konponbidean lan egiteko borondaterik ez badu”, euskal herritarrek “euren bide propioa” egin beharko dutela nabarmendu du. Elkarretaratzearen amaieran biharko Bilboko manifestazioa debekatzeko “aitzakiarik” ez dagoela berretsi dute, baina Espainiako Auzitegi Nazionaletik “edozer gauza” etor daitekeela ohartarazi dute. Bilbon manifestazio nazionala egingo dute bihar, 17:30ean, sakabanaketaren aurka. Bi “olatu handi” aterako dira Casillatik eta Bilboko Udaletik, ordubete beranduago “itsaso zabal” bat osatzeko. Atxilotuei dagokienez, Madrilera eraman zituzten atzo. Zortzi atxilotuen artean hiru donostiar daude: Jon Enparantza antiguatarra, Joxe Campo egiatarra eta Groseko Aintzane Orkolaga.

EH Bilduko legebiltzarkide Rebeka Ubera. (Argazkia: Aritz Sorzabal)