Dbusek bi geltoki gehiago jarriko ditu Zuatzuko enpresa gunean

Aritz Sorzabal

2014/02/14

Zuatzu enpresa gunea, Europa eraikinetik. (Argazkia: Mikel Goñi)

Astelehenetik aurrera, Dbusek Zuatzuko eta Añorgako autobus zerbitzua hobetuko du, Benta Berriko linearen (5 linea) eta Benta Berri-Añorgako linearen (25 linea) ibilbideak luzatuta, alde horietako bizilagunen eta langileen premiei erantzuteko. Dbusek bi geltoki gehiago jarriko ditu Zuatzuko enpresa gunearen barruan, eremuan zerbitzu zabalagoa emateko, gaur egun enpresa parkearen sarrerako geltokia baino ez dute-eta. Geltoki berriak Zuatzu-Urola eta Zuatzu-Ulia eraikinen parean kokatuko dituzte, eta autobusak enpresa parkeko kale nagusitik ibiliko dira. Autobusak Bulebarretik aterako dira, 9:00etan hasiko dira, eta 20 minutuko maiztasunez ibiliko dira. 7:00etatik 9:00etara zerbitzua Zuatzuko geltokiraino emango dute, beti bezala, 6-8 minutuko maiztasunez. Benta Berri-Añorga lineak (25 linea), bestalde, beste ibilbide bat egingo du Añorgako erdigunearen eta Belartzaren artean, Karmengo Amaren aldeari zerbitzua emateko, orain arte alde horretan ez baitzegoen garraio publikorik. Horrela, autobusak Karmengo Amatik eta Errotazarretik ibiliko dira, Belartzara iritsi arte eta handik ohiko ibilbidearekin jarraitzeko, Errekalde IIraino. Neurri horrekin, Añorgako alde horretako bizilagunei zerbitzu hobea emateaz gain, linearen puntualtasuna hobetuko dute, ibilbidea egiteko denbora gutxiago beharko delako. Benta Berri-Añorga 25 linearen zerbitzua, Añorgara, Bulebarretik aterako da eta 20 minutuko maiztasunez ibiliko da lanegunetan eta 30 minutuko maiztasunez larunbat eta jaiegunetan. Zerbitzu guztiak Belartzako industrialderaino helduko dira, Errekalden bukatzeko.