Herritar bat Dbziko bizikleta elektrikoarekin. (Argazkia: Lide Ferreira)
Jon Albizuk, Mugikortasun zinegotziak bizikleta sustatzeko proiektu aitzindarietan parte hartzearen garrantzi azpimarratu du: “bizikletaren alde egiteko orduan baliabide gehiago izango ditugu programa hauei esker. Gainera, aukera izango dugu beste hiriekin elkarlanean erabilera bultzatzeko eta sortzen diren arazoak konpontzeko. Bizikleta hiriko garraio bidea izatea nahi dugu, eta horretarako irmo jokatu behar dugu bidegorriak hobetzen eta aparkatzeko arazoak konpontzen”.
Switch proiektuak 141.000 euroko aurrekontua du eta 24 hilabetetan garatuko da. Proiektuak hamahiru partaide ditu, besteak beste, Austria, Alemania, Belgika, Errumania, Polonia, Erresuma Batu eta Esloveniako zenbait hiri eta erakunde. Proiektuaren helburu nagusia motordunen trafikoa murriztea da. Horretarako, hiriko ibilbide laburrak oinez edo bizikletaz egitea lortu behar da. Ibilbide laburretan autoa erabiltzeko joera apurtu nahi dute. Oinez eta bizikletaz ibiltzeko ekintzak garraio publikoaren ekintza sinergiko batzuekin uztartuko dira. Horretarako mugikortasun aktiboa sustatzeko ekitaldiak burutuko dituzte, eta ekitaldi horien eragina aztertuko dute.
Cycleogistics Ahead, 36 hilabetekoa izango da eta guztira 175.000 euroko aurrekontua du. Proiektu honetako bazkideak Austria, Erresuma Batu, Belgika, Alemania, Txekiar Errepublika, Italia eta Hungaria dira, besteak beste.
Proiektu honek merkantziak garraiatzean sortutako emisioak eta energia kontsumoa murriztu nahi ditu. Horretako zero isuriko aplikazio logistikoak ezarriko dituzte hiriguneetan. Beraz, zero isuriko banaketa enpresen alde egingo dute, enpresa horien profesionaltasuna sustatuz. Araudiak ezarriko dira zero isuri lortzeko hiri logistika garatu dadin, ibilgailu kutsakorrak pixkanaka murriztuz.
