Donostiako Udalean 100 urte baino gehiago daramatzala ospatu du EAJk
Zinegotzi jeltzaleren bat izan du beti hiriak 1911tik; bertatik igarotako ordezkariak omendu ditu alderdiak, Bulebarrean egindako ekitaldian.
Eusko Alderdi Jeltzalearen ordezkariz eta jarraitzailez bete da Bulebarra, gaur goizean. Izan ere, Donostiako Udalean ordezkaritza duenetik 100 urte baino gehiago bete dituela ospatu du alderdiak. Eneko Goia Donostiako Udaleko EAJren bozeramailea, Joseba Egibar Gipuzkoa Buru Batzarreko presidentea eta Andoni Ortuzar Euskadi Buru Batzarreko presidentea izan dira ekitaldiaren gidariak. Ehun urteko historiaren errepasoa egin dute, eta hiriak izandako alkate jeltzaleak gogoan izan dituzte uneoro; Jesus Mari Alkain (Donostia, 1922-2001) eta Ramon Labaien (Tolosa, 1928-Donostia, 2013), bereziki. Udaletik igarotako zinegotzi guztiak omendu dituzte, Izan zirelako gara… garelako izango dira lelopean, eta hainbat une gogoangarri oroitu dituzte. “Gora Euskadi askatuta!” oihuarekin bukatu dute politikari guztiek euren gogoeta.
Zehazki, 1911tik beti izan da ordezkari jeltzaleren bat Donostiako Udalean. Bat baino gehiago izan dira, gainera, alkate postua bete dute ordezkari jeltzaleak; Jesus Mari Alkain, esaterako, 1979an izendatu zuten, eta 1983 arte bete zuen kargua; ondoren, 1983an bertan, Ramon Labaienek hartu zuen lekukoa, 1987 arte; eta Xabier Albisturrek bete zuen jarraian kargua, 1991 arte. Ekitaldian eskaini duten hamar minutuko ikus-entzunezko batean, hildako bi alkate ohiek egindako lana gogoan izan dute. Egungo zinegotziek zein zinegotzi izandakoek hitz egin dute ikus-entzunezkoan: Maria Pilar Larraina, Martin Elizasu, Eneko Goia, Mertxe Garmendia, Xabier Ezeizabarrena…
Egibar izan da eszenatokira igotzen lehena, eta iraganaz zein etorkizunaz hitz egin du. “Herri bat, nazio bat, beti behetik gora eraiki behar da. Euskal herrigintzan badaude bi gako, herria maitatzea eta herritarrak errespetatzea”, aipatu du Egibarrek. Hala, lehen batzokia Bulebarrean bertan zabaldu zutela gogorarazi du, eta bere hitzetan, 1976tik honuntza EAJk beti estrategia bat jarraitu du; “herritarrak eta herria errespetatuz bidegile izan da, eta asmatu egin dugu”. Ehun urteko ordezkaritzaren ostean, berriro ere alkatetza lortzea espero duela esan du Egibarrek. “Inoiz baino gehiago eta elkar hartuta, egin behar dugu ez jada Euskadi edo Gipuzkoa, baita ere Donostiatik hasita… Donostia herri eta bizi baten aldeko apustua. Hiri honek merezi duelako, hiriburu honek merezi duelako; herri bizia, Donostia bihotzduna, berritzailea, ekintzailea. Nik uste dut hor dagoela momentu honetan erronkarik handiena”.
Eneko Goiak, bere aldetik, Alkainen eta Labaienen lana goraipatu du; “Biek ordezkatzen dute ongi baino hobeto zer den Eusko Alderdi Jeltzalea hiri honetan eta udal honetan”. Bere hitzetan, Jesus Mari Alkainek “etxeari eutsi zion”, oinarri finkoekin, eta Ramon Labaienek, berriz, amets egin zuen eta etorkizuneko Donostia ikusteko gai izan zen. “Labaienek kultura jarri zuen hiriaren erakargarri nagusi gisa. 2016an Donostia kultur erreferente izateko apustua egin badugu, egin dezagun ongi”.
Udaletik igarotako hainbat zinegotzi omentzeko, oroigarri bana banatu diete, eta azkenik, aurreskua eskaini diete ekitaldiari bukaera emateko.
Ekitaldiaren bukaeran aurreskua eskaini diete Donostiako Udalean EAJko zinegotzi izandako hainbat kideri. (Argazkia: E. Zabala)
-
- Andoni Ortuzar. (Argazkia: E. Zabala)
-
- Ramon Labaienen sendiko bat, ezkerretik bigarrena, oroigarria jasotzen. (Argazkia: E. Zabala)
-
- Donostiako alkate izandako Jesus Mari Alkainen semea, ezkerretik bigarrena, oroigarria jasotzen. (Argazkia: E. Zabala)
-
- Eneko Goia. (Argazkia: E. Zabala)
-
- Hamar minutuko ikus-entzunezkoa eskaini dute. (Argazkia: E. Zabala)
-
- Joseba Egibar.
