75. Musika Hamabostaldia auzoetara iritsiko da
75. Musika Hamabostaldiak 76 ikusikizun eskainiko ditu, abuztuaren 1etik 31 bitarte.
Musika Hamabostaldiaren edizio berria aurkeztu dute gaur goizean Kursaalen. 75 urte betetzen dituen edizio honek 76 jarduera izango ditu, iaz baino hamabost gehiago; eta berriak diren horiek doan izango dira, “herritar guztiek musikaz gozatu dezaten”. Programa zabala da, eta abuztuan zehar ospatuko dute, 1etik 31 arte.
Ospakizun edizioak proposamen kopurua handitzeaz gain, jaialdia gune berrietara hedatuko da. Hasierako ekitaldian, abuztuak 1, hamazazpi ikuskizun musika izpiritua Egia, Aiete, Amara, Parte Zaharra, Gros eta Erdialdean zehar hedatuko dute. Kursaal Auditorioan lehen kontzertu sinfonikoa eskainiko dute Toulouseko Kapitolioko Orkestra Nazionalak, Donostiako Orfeoiak eta Orfeoi txikiak. Horren ostean, 22:30ean, inaugurazio eguna Xarxa Teatreren musika, argiak eta piroteknia uztartzen dituen ekoizpenarekin amaituko da. Donostiako auzoetara hedatzeaz gain, Musika Hamabostaldia Gipuzkoa, Nafarroa, bizkaia, Nafarroa Behera eta Arabako hainbat gunetara ere iritsiko da.
Aurreko edizioek orokorrean gai baten inguruan ziharduten, baina Patrick Alfaya Musika Hamabostaldiko zuzendariak aurtengo edizioak hiru zutabe izango dituela azaldu du, gaia alde batera utziz.
74 edizio ospatuko badira ere, Musika Hamabostaldiak 75 urte beteko ditu, eta urtemuga hori izan da gaur Kursaalen egin duten aurkezpenaren ardatza. Ikerne Badiola Aldundiko Kultura diputatuak urte guzti hauetan lan handia egin dela azaldu du, eta jaialdia aurrera eraman dutenei bere esker ona eman die. Hala ere, 34 urtez zuzendari izandako Jose Antonio Etxenikeren lana bereziki eskertu nahi izan du. “Seguraski bera gabe Hamabostaldia ez zen izango orain dena: irekia, anitza, zabala, goi mailakoa, baina aldi berean herritarra eta publiko guztia erakartzen saiatzen dena. Etxenikek krisi garaian hartu zuen Hamabostaldia, 1969an, eta 30 urtez berreskuratu eta gailurrean kokatu zuen”.
Josean Muñoz Eusko Jaurlaritza Kultura sailburuordeak Hamabostaldia estatu espainiarreko musika jaialdirik zaharrena dela gogorarazi du. “1939ko Donostian ohitura musikala zegoen, gizartea inplikatu zen. Oinarri hori egon izan ez balitz, jaialdia ez zen sortuko. Hasieratik zeukan irauteko borondatea, eta jendearen fideltasuna izan da iraupenaren ezaugarri nagusia”. Horretaz gain, babesle eta erakundeen parte hartzea osagai funtsezkoak direla aitortu du.
75 Musika Hamabostaldiko aurkezpena Kursaalen egin dute. (Argazkia: Lide Ferreira)
- Hamabostaldiaren lehendabiziko urtetan egindako obrak berreskuratuko dituzte. Esate baterako, Schuberten Sinfonia burutu gabeak emango dio amaiera jaialdiari. 70. hamarkadan azken aldiz eman zuten G. Pucciniren La Boheme ere berreskuratuko dute. Bestalde, hasierako edizioetan oso present egon ziren bi genero nabarmenduko dituzte, barrokoa eta dantza bueltatuko dira. Izan ere, John Eliot Gardiner zuzendariak eta René Jabobs musikagile barrokoak kontzertuak eskainiko dituzte. Dantzari dagokienez, Victor Ullate dantzaria izango da protagonista.
- Bigarrenik, publiko zabalari zuzendua egongo dela esan du Alfayak. Horregatik, aurrekontua handitu dute eta iaz baino hamabost kontzertu gehiago eskainiko dituzte. Berri horiek guztiak musutruk izango dira. Adibidez, Kursaaleko terrazan, abuztuaren 1ean, 22:30etan, musika, argiak eta piroteknia jokoak ikus eta entzuteko aukera izango dute bertaratzen direnek.
- Azkenik, bikaintasun artistikoa eskainiko dutela aitortu du Hamabostaldiko zuzendariak. “La Boheme opera, adibidez, azkenaldiko produkziorik onena da, eta horixe aurten eskainiko dugu”.
75 Musika Hambostaldiko kartela. (Argazkia: Lide Ferreira)
