'Musarañas' filmak emango dio hasiera Fantasiazko eta Beldurrezko Zinemaren XXV. Asteari

Irutxuloko Hitza

2014/09/12

Urriaren 25ean aurkeztuko dute filma, Donostiako Antzoki Zaharrean.

Musarañas.

Fantasiazko eta Beldurrezko Zinemaren XXV. Astea zabalduko du ‘Musarañas’ filmak, urriaren 25ean, Antzoki Zaharrean. Juanfer Andres eta Esteban Roel dira film honen zuzendariak, eta Alex de la Iglesia eta Carolina Bangen Pokeepsie Films etxearen bidez ekoitzi dute. Aurreko astean Torontoko jaialdian aurkeztu zuten. Espainia, 50eko hamarkada. Montsek (Macarena Gomez) ahizpa txikia zaintzen gaztaroa galdu du, biak Madril erdialdeko zoritxarreko pisuan sartuta bizi direla. Haien ama alaba txikia (Nadia de Santiago) jaio zenean hil zen, eta aitak (Luis Tosar) ezin izan zuen egoera jasan eta ihes egin zuen. Aldi berean aita, ama eta ahizpa zaharrena izatera behartu zuten Montse, eta bizitzatik kanpo ezkutatuta bizi da lau pareta artean, izaera obsesiboa eta desorekatuarekin: agorafobia du eta ezin du etxetik kanpo pauso bat ere eman. Egun batez, bizilagun gazte bat (Hugo Silva) agertuko da haien bizitzetan. Film luzeen aurrerapena Horretaz gain, Donostia Kulturak urriaren 25etik azaroaren 1era bitarte emango dituzte film luzeak zeintzuk izango diren jakinarazi du:

Dead Snow 2: Red vs. Dead / Død Snø 2 (2014). Tommy Wirkola. Norvegia-Islandia

Dead Snow 2.

Zure bizitzako egun okerrena neska-laguna aizkoraz hiltzean, zerra mekanikoarekin besoa moztean eta zonbi nazien batailoi batek zure lagun onenak irenstean oinarritzen bada, onartu beharko duzu oso zaila dela gauzak gehiago okertzea. Martinen kasuan, hura hasiera besterik ez zen izan. Azken urteotako beldurrezko film dibertigarri, original eta arrakastatsuenetako baten bigarren atala da. Aurrekoa amaitutako unean abiatzen da, Herzog koronelaren aginduetara zonbi bilakatutako soldaduak Martin harrapatzen saiatzen ari diren unean. Tommy Wirkolak zuzendu du filma berriz ere, Hollywooden Hansel & Gretel: Witch Hunters (2013) filma aurkeztu ondoren.

The Guest (2014). Adam Wingard. AEB

The Guest.

David gonbidatu perfektua da. Atsegina eta maitagarria, soldadu gaztea Petersondarren etxera iritsiko da borrokan hildako haien semearen lagun eta kamarada zaharra dela esanez. Petersondarrek etxean eta haien bizitzetan sartzen utziko diote Davidi. Baina hirian jende ugari era misteriotsuan hiltzen hastean, familiako alaba nerabeak David agian dirudiena ez dela susmatzen hasiko da. Adam Wingarden film berria da. You’re Next (2011) filma ere zuzendu zuen, eta zenbait film kolektibotan parte hartu du, hala nola, V/H/S (2012) eta The ABCs of Death (2012) filmetan.

The Last Days on Mars (2014). Ruairí Robinson. Erresuma Batua-Irlanda

The Last Days on Mars.

Martera bideratutako lehen misioaren azken egunean, taldeko kide batek sekulako aurkikuntza egin duela uste du: bakterio bizitza fosilduaren arrastoa. Aurkikuntza guztia bere gain hartzeko asmoz, aginduei muzin egin eta beste lagin baten bila abiatuko da planeta gorria utzi aurretik. Baina istripu bat izango du. Eta baliteke aurkitu berri duen bizitza hori uste bezain hilik ez egotea. Liev Schreiber, Elias Koteas, Romola Garai eta Olivia Williams dira Ruairi Robinson irlandarrak zuzendari gisa egindako debutaren protagonistak.

The Man in the Orange Jacket (2014). Aik Karapetian. Letonia-Estonia

The Man in the Orange Jacket.

Portuan egiten zuen lanetik kaleratuta, bere ugazaba eta haren emaztea zelatatzeari ekingo dio gazte batek. Zenbait gertakari odoltsuren ostean, haien etxean sartuko da eta pixkanaka beste pertsona batean bilakatuko da. Aurreko pertsonaren eta habitat berrian sortzen ari denaren arteko gatazka sortuko da. Aik Karapetian armeniarrak zuzendutako film lehorra, aztoragarria eta latza. Baltiko aldetik mundu osoko genero jaialdietan arrakasta handia izaten ari da zuzendaria.

Puzzle / Pazuru (2014). Eisuke Naito. Japonia

Puzzle.

Talde armatu misteriotsu batek Japoniako hiri txiki bateko institutua indarrez hartuko du. Puzzle bitxi bat prestatuko dute, eta puzzlea ebatzi egin beharko dute bahitu gisa hartu duten irakaslearen bizia salbatzeko. Baina, ezustean, bahitzaileak irakaslearekin eta institutuko zenbait ikaslerekin batera desagertuko dira. Misteriozko eta beldurrezko puzzle txikia, filma aurrera doan heinean, pixkanaka argitzen doana.

[REC]4 (2014). Jaume Balaguero. Espainia

REC 4.

Gaur egungo beldurraren ikuspegia aldatu duen istorioaren laugarren eta azken filma. Oraingoan, Jaume Balaguero bakarrik jarri da kamera atzean; istorioaren amaiera kontatuko al du? Istorioa Angela Vidal (Manuela Velasco), infekzio izugarritik bizirik irten den pertsona bakarra, eraikinetik ateratzeko unean hasten da. Egoera kontrolatuta dagoela dirudienean, ordea, kaosa itzuliko da berriz ere eta gaizkiaren hazia forma berri eta izugarriekin ernatuko da. Zuzendariaren hitzetan: “Sekulako ardura adierazten duela jakitun, laugarren filma desberdina, baina aurrekoekiko fidela izatea izan da nire asmoa; istorioaren jatorri maltzur eta ilunetara itzulera. Koska bat estuago, urrats bat gehiago ezezagunerantz, izu hutserantz. Beldurraren eta itoaldiaren jolas parke berri bat eraikiko dugu. Eta, oraingoan, handiagoa, zorabiagarriagoa, biziagoa… izan dadin saiatuko gara. Eta baita… akuatikoa ere”.

Shock Value: The Movie. How Dan O’Bannon and Some USC Outsiders Helped Invent Modern Horror (2014). AEB

Shock Value.

Film honetan Dino Everett kontserbatzaileak USC (University of Southern California)-eko ikasle batzuk egindako zenbait laburmetrai elkartu ditu. Haien artean, John Carpenter –Halloween (1978), The Thing (1982)– eta Dan O’Bannon –Alien (1979) eta Total Recall (1990) filmen gidoilaria–. Hirurogeita eta hirurogeita hamarreko hamarkadan haiek eta beste ikaskide batzuk (Terry Winkless, Alec Lorimare edo Charles Adair) filmatu zituzten lan hauek.

V/H/S Viral (2014). Justin Benson & Aaron Moorhead, Gregg Bishop, Marcel Sarmiento, Nacho Vigalondo. AEB

VHS Viral.

Istorioaren hirugarren filma lau pasartek osatzen dute eta Justin Benson & Aaron Moorhead –Resolution (2012)–, Gregg Bishop –Dance of the Dead (2008)–, Marcel Sarmiento –Deadgirl (2008)– eta Nacho Vigalondo –Open Windows (2014)– zuzendariek zuzendu dituzte. Burutik egindako ilusionista batek botere handia emango dion kapa eskuratuko du; etxeko makina batek beste mundu baterako atea irekitzen du, eta mundu bera dirudien arren, ez da horrela; skater talde bat sorginkeria erritu baten biktima bilakatuko da; eta erakunde ilun bat hiltzaile baten atzetik dabil. Istorio horiek kontatzen ditu filmak, nerabe talde batek Los Angelesen automobilen jazarpen baten atzetik dabilen bitartean.

What We Do in the Shadows (2014). Jemaine Clement, Taika Waititi. Zelanda Berria

What We Do in the Shadows.

Viago, Deacon eta Vladislav pisukideak dira. Eta banpiroak dira. Bizi duten garai berrira egokitzen saiatzen dira, bai eta jende guztiaren moduko jarrera izaten ere… hilezkorrak direla eta gizakien odolez elikatzen direla salbu. 8.000 urteko Petyr lagunak, Nick izeneko hogei urteko hipster gazte bat banpiro bihurtuko du, eta arauak erakutsi eta eskuratu berri duen betirako bizitzan barrena gidatuko dute. Horren truke, gazteak gizarte modernoari, modari eta Interneti buruzko gauzak erakutsiko dizkie. Dokumental hau modu ezohikoan hurbiltzen zaie generoaren pertsonaia klasikoei, baina, era berean, eguneroko bizitzan ezezagunak direnei.

Zombeavers (2014). Jordan Rubin. AEB

Zombeavers.

Hiru neska basoaren erdian, aintzira baten bazterrean kokatutako txabolan. Eguneroko bizitzatik, ikasketetatik, gurasoengandik, mutil lagunengandik… aldentzeko asmoz iritsi dira. Mutil lagunak, ordea, ezustean agertuko dira eta eguzkia hartuz igaro beharreko asteburu lasaia zirudiena, festa bilakatuko da. Edo antzeko zerbait. Izan ere, bitartean, material arriskutsuz betetako bidoiak dituen kamioi bati bidoi horietako bat ibaira eroriko zaio istripuz. Bidoietako substantzia kastore batzuen gainera eroriko da eta mutazioa jasango dute, eta… kastore zonbi bilakatuko dira!