San Sebastian egunerako argazki lehiaketa bat antolatu du udalak

Irutxuloko Hitza

2014/12/15

Saridunek 2016ko festako ekitaldiak udal balkoietatik ikusteko parada izango dute.

Iazko irabazlearen irudia. (Argazkia: Ander Morea)

San Sebastian Eguneko festaren harira, Donostiako Udalak argazki lehiaketa bat antolatu du. Helburua festa girotzea eta donostiarrek sare sozialen bidez danborraden inguruko argazkiak partekatzea da. Udalak, beraz, argazkiak jaso, argitaratu eta saritu egingo ditu. Irabazleek datorren urteko San Sebastian Eguneko festako ekitaldi nagusiak udal balkoietatik ikusteko aukera izango dute. Lehiaketan edonork hartu dezake parte, eta pertsona bakoitzak argazki bakarra aurkezteko aukera izango du, hiru modutan:

Twitter: #niredanborrada traola erabiliz argazkia publikatzea.
Facebook: Donostia Gaur orrialdean ‘atsegin dut’ sakatu eta kontu horren denbora lerroan publikatzea, argazkiari Nire danborrada izenburua jarriz.
Helbide elektronikoa: GAURen helbide elektronikora (donostia.gaur@gmail.com) mezu bat bidali eta argazkia eranstea gaian Nire danborrada izenburua idatziz.

Argazkiak gaurtik urtarrilaren 21eko gauera arte bidaltzeko aukera egongo da, eta saridunen izenak udaleko webgunea eta sare sozialen bidez jakinaraziko dituzte. Gainera, urtarrilaren 23an, parte hartu dutenen argazkiz osatutako galeria bat ere argitaratuko dute. Sariak honakoak izango dira: 1. saria, argazki onenari: 2016ko San Sebastian Egunari hasiera emango dion banderaren igoera Konstituzio plazako eraikineko lehenengo solairuko balkoitik ikusteko aukera, bi lagunentzat. 2. saria, parekidetasuna islatzen duen argazki onenari: 2016ko San Sebastian Egunari amaiera emango dion banderaren jaitsiera Konstituzio plazako eraikineko lehenengo solairuko balkoitik ikusteko aukera, bi lagunentzat. 3. saria, talde edo danborrada ageri den argazki onenari: 2016ko San Sebastian Eguneko haur danborrada udaletxeko balkoi batetik jarraitzeko aukera, bi lagunentzat. 4. saria, munduko danborradak, argazki onenari: San Sebastian Egunean ohikoak diren doinuak biltzen dituen CDa bidaliko diogu.