Kantu Jirak Hiritar Merezimenduaren Domina jasoko du

Nerea Lizarralde

2014/12/16

Kantu Jiraren 10. urtemugaren ospakizuna, iaz. (Argazkia: Irutxuloko Hitza)

Donostiako Udaleko bozeramaileen batzordeak 2015eko Hiritar Merezimenduaren Dominak nork jasoko dituen erabaki du goizean izandako bilera batean. Kantu Jirak urte hauetan egindako lana aitortuko dute, besteak beste. Juan Jose Ocon musikari eta orkestra zuzendaria, Txoko-Txiki, Goienetxe Fundazioa eta Maria Jesus Bragado irakasleak ere sarituko dituzte. Urtero bezala, domina hauek San Sebastian egunaren bezperan entregatuko dira arratsaldez, Udalbatza Aretoan egingo den ekitaldian. Goienetxe Fundazioa: http://vimeo.com/60740486 1950. urtean sortutako erakunde ongile, pribatu eta irabazi asmorik gabekoa da. Bere helburua arreta okupazionalaren bitartez adimen urritasuna duten pertsona helduei zerbitzuak eskaintzea da. 50 profesional baino gehiagok egiten dute lan Gipuzkoan zehar dituen 12 zentroetan. Donostian Berio pasealekuan du egoitza. Programa hau Gipuzkoako Foru Aldundiko Politika Sozialeko Departamentuarekin itundua dago. Juan Jose Ocon:

Musikaria eta orkestra-zuzendaria (Donostia, 1968). Donostiako Udalaren Musika eta Dantza Eskolako irakaslea eta Euskal Herriko Gazte Orkestrako (EGO) egungo zuzendaria. Donostiako Musika Hamabostaldia zuzendu du hainbat ediziotan. Era berean, Donostiako Orfeoiaren laguntzaile gisa jardun du maiz. 1999an egin zuen debuta Madrilgo Teatro Real antzokian, Carl Orff-en Carmina Burana obrarekin, eta kritika espezializatuaren aho bateko oniritzia jaso zuen. Maria Jesus Bragado: Feminismoaren inguruan lan handia egin duen emakumezko altzatarra da. Historia irakaslea da. Altzan bertan sinadura asko bildu dituzte Bragadoren lana aitortzeko. Herritarrek egindako proposamenetako bat zen Bragadorentzako domina. Kantu Jira:

Donostiako Kantu Jira duela hamar urte abiatu zen, hain zuzen ere, Euskaldunon Egunkariaren itxiera salatzeko. Lehen txanda hartan 80 lagun elkartu ziren. Ondoren, aurrera jarraitu zuten. Orain hilabetero biltzen dira, normalean 250 bat lagun. Iaz hamar urte bete zituen. Txoko Txiki: Gurutze Gorriak haurrei eskaintzen dien zerbitzu berezi bat da. Intxaurrondon du egoitza. Atzerritik etorritako haurrentzako zerbitzu bat da.