Ingurumenerako aurrekontuak ere igo dituzte
Axier Jaka Ingurumeneko zinegotzia ere bada, eta sail honetako aurrekontuetan ere igoerak iragarri ditu gaur. Horrela, udalak 200.000 euro gehiago bideratuko ditu bioaniztasuna babestu eta garapen iraunkorra sustatzeko. Guztira 4.205.018 euro jasoko ditu Ingurumen sailak.
Horrekin batera, 2015-2030 epean ezarri beharreko erronka eta helburuak zehaztu dituztela adierazi du Jakak: “Hiri berde bat nahi dugu, bizi kalitatea duena, biodibertsitatearen balioa azpimarratu eta inguru osasungarria duena. Horregatik, ingurumen politika sektorialak sartu ditugu, esate baterako Energia Garapen Iraunkorrerako Ekintza Plana”.
Jakaren arabera, aurrekontu proiektuan 397.132 euro jaso dira osasun ingurumenerako, iaz baino kopuru handiagoa (40.000 euro). Hazkunde horri esker, 20.000 euro lehengoratze ekologikora bideratuko dituzte eta 38.000 euro Klima Aldaketara Egokitzeko planerako. Horrez gain, kutsadura elektromagnetikoaren aurkako ekintzetan 30.000 euro inbertituko dituzte, 40.000 euro birgaitze energetikoan eta 50.000 euro kutsadura akustikoaren aurkako pantailetan.
Proiektuak abian
Bestalde, Ingurumen zinegotziak hainbat proiektu aurkeztu ditu. Horrela, Artikutzako presaren maila jaisteko 220.000 euro eskainiko dituzte, azpiegitura horren segurtasun baldintzak hobetzeko. Artikutzak, bestetik, 230.000 euroren aurrekontua izango du aniztasuna eta ingurumen hezkuntza sustatzeko. Artikutzako bioaniztasuna eta espezieak ikertzeko bekak, berriz, 19.540 eurorekin sustatuko dituzte.
Lau Haizetako baratze publikoen parkeak handitzen jarraituko dute, eta aurten 50.000 euro jasoko dituzte. Era berean, Uliako bidezidorretako ibilbideak 20.000 euro izango ditu.
Herritarren proposamenei erantzunez atera da Uliako bideak berritzeko dirulaguntza; hala, lehen aldiz partaidetza prozesu baten ondoren adostu da aurrekontua. Horrekin batera bost proposamen jaso dira, 176.000 euroko partidak izango dituztenak: Uliako lanak (bioaniztasuneko partidak gehituta 48.000 euro), Bidebietan; kutsadura elektromagnetikoari aurre egiteko neurriak (30.000 euro), Egian; konposta publikoa (28.000 euro), Martutenen; pantaila akustikoak (65.000 euro), Morlansen; eta gaueko zarataren kontrako sentsibilizazio ekintzetarako (5.000 euro), parte Zaharrean. Bestetik, ingurumen proiektuak bultzatzen dituzten elkarteek 24.500 euro jasoko dituzte. Gainerako dirua honako guneetan inbertituko dute: Kristina Enea, 460.000 euro; Osasun Publikoa, 271.033 euro (Gehiena kaleko animaliak jaso eta zaintzeko eta arratoiak hiltzeko programak dira); Sorospen Etxea, 252.604 euro; Eskola Osasuna, 3.670 euro; eta KIUB, 76.796 euro.
