Anbulategia egiteko Bretxa eraikinaren zati bat eskuratzea erabaki du Tokiko Gobernu Batzordeak
Udalaren helburua eraikin guztia eskuratzea da.
Interes publikoa dela eta, Tokiko Gobernu batzordeak Bretxa eraikinaren zati bat eskuratzea erabaki du. Honela, Arrandegia izan zen eraikineko kale mailako, lehenengo eta bigarren solairuetako toki batzuetan anbulategia kokatuko dute, Parte Zaharreko eta Erdialdeko bizilagunek bertan zerbitzua izan dezaten. Borondate hau gauzatzeko, Bretxa Merkataritza Gunearekin kontzesioaren kontratua aldatzea ezinbestekoa da. Alde horretatik, interes publikoa badago, administrazioak eskumena du kontratua aldatzeko. Hala ere, une honetan kontzesioa duen enpresak hamar eguneko epea du nahi duena adierazi, helegiteak aurkeztu eta informatzeko.
Arraindegi zaharraren eraikinaren parte bat eskuratzea prozesuaren hasiera dela dio udal gobernuak, euren azken helburua eraikin guztia berreskuratzea baita. Lortuz gero, Sorospen Etxea anbulategi berrian kokatuko lukete; 24 orduz emango luke zerbitzua eta kudeaketa publikokoa izango litzateke. Bestalde, egungo anbulategia dagoen eraikinean Haurtxoko bat jartzeko asmoa du udal gobernuak, haurrei zuzendutako espazio bat sortuz.
Eraikin berean hiritar eta bisitariei zuzendutako beste hainbat zerbitzu izango lituzke. Turismo bulegoa egungoa baino handiagoa izango litateke eta 140.000 euro aurreztuko luke udalak aldaketa horrekin. Erabakia udaleko taldeek eta agente pribatuek osatzen duten Donostia Turismoko administrazio kontseiluak berretsi beharko luke. Eraikinaren goiko solairuetan kirol instalazio publikoak jarriko lituzkete. Egun merkatu tradizionala eta supermerkatu bat dauden solairuak erabilera berbera mantenduko luke.
Arraindegi eraikinean egingo dute Parte Zaharreko osasun etxe berria. (Argazkia: Lide Ferreira)
