Igeldotarrek udalerria aldarrikatu dute Gascoren ekitaldian
Donostiako PSEren alkategaiak agerraldia egin du bertan, Igeldo Donostiaren parte izaten jarraitu dezan eskatuz.
Ernesto Gasco Donostiako PSEko alkategaia Igeldon izan da gaur goizean; zehazki, Igeldo plazan bildu da, hainbat alderdikiderekin batera. Ekitaldian adierazpenak egiten hasita, hainbat igeldotarrek udalerria aldarrikatzeko pankartak atera dituzte, “Herriak erabaki du” eta “Inposaketarik ez” oihukatuz.
Gascok, bestalde, Igeldo Donostiaren parte izaten jarraitu dezala aldarrikatu du, eta igeldotarren protesta salatu du, adierazpen askatasunaren aurka egin dutela egotzita: “Argi dago batzuek ez digutela uzten askatasunez hitz egiten, hau da gutxi batzuk nahi duten Donostia”. Horrela, udal gobernuak Igeldon nahikoa inbertitzen ez duela adierazi du PSEko zinegotziak: “PSE alkatetzara iristen bada, Igeldoren berezitasunak defendatuko ditu, beti ere, Donostiako auzo bat dela ulertuta”.
