Sudur Kroserako izen ematea zabaldu dute

Egiako parkean barrena egingo dute lasterketa apirilaren 18an, seigarren urtez jarraian

Estitxu Zabala

2015/03/23

Korrikalariak aldapan gora, iazko sudur krosean. (Argazkia: E. Zabala)

Sudurzaleen lasterketarako hilabete bat baino gutxiago falta da. Izan ere, Egiako parkean barrena, VI. Sudur Krosa jokatuko dute, apirilaren 18an, 16:00etan. Kroserako izen ematea ireki dute jada, Egiako Kata tabernan zein Herrikrossa.com webgunean. Guztira, sei kilometroko ibilbidea egin beharko dute partaideek parkeko maldetan gora eta behera, 6’50 euroren truke. Partaide guztiek jasoko dute Sudur Krosaren kamixeta tekniko bana opari gisa, baita Sudur Krosaren sagardo edalontzi bat ere. Gainera, mokadu bat hartzeko tartea izango dute behin lasterketa bukatuta, eta hainbat opari zozkatuko dituzte guztien artean. Lehenengo gizonezko eta emakumezko egiatarrek IRUTXULOKO HITZAren urtebeteko doako harpidetza irabaziko dute, eta lehen beteranoek Hitza Saria jasoko dute; gainera, partaide guztien artean, Hitzako materiala zozkatuko dute. Bestetik, mozorrorik onenak ere saria izango du aurtengoan. Sudur Txiki lasterketa ere jokatutako dute egun berean, hirugarren urtez jarraian. Zehazki, 0-2, 3-5, 6-9 eta 10-12 urte arteko mailak banatuko dituzte. Izena emateak 2 euro balio du eta auzoan barrena banatu dituzte bertan parte hartzeko izen emate orriak. Lasterketa txikiko partaide guztiek ere sariak izango dituzte.