Morlanstarrek auzoa piztu dute

Euripean hasi dituzte jaiak, baina eguraldi txarrari aurre egin diote festa giroan.

Nerea Lizarralde

2015/05/15

Morlans berritik eta Morlans zaharretik ekarritako suekin piztu dute jaietako ikusr bihurtu den faroltxoa.(Argazkia: Nerea Lizarralde)

Jaietako ikur bihurtu den faroltxoa piztu dute lehen aldiz auzotarrek gaur arratsaldean. Festei hasiera emateko modu berri bat estreinatu dute aurten, eta ikusmina nabarmena zen. Auzoko gune berrienetik eta goialdetik talde bana atera da su batekin, eta plazan elkartu dira, elkarrekin antzinako gas farolen itxura duen sinboloa piztu dute. Montsek eta Ametsek izan dute faroltxoaren piztean estreinakoz parte hartzeko aukera. Ondoren, auzoko haur talde batek Beñat Gaztelumendi bertsolari añorgatarrak morlanstarrentzat idatzitako bertsoa abestu dute. Auzoa egitera eta festa giroaz gozatzera deitu dituzte auzotarrak Gaztelumendiren hitzen bidez. Txupinaren suarekin hasi da musika auzoan, eta ondoren danborradak hartu ditu kaleak. Lehen danbor hotsak entzun direnerako euri zaparradak hasi dira, baina halere aurrera egin dute danborrari ausartek. Blai eginda, baina gogotsu eta alai joan dira auzoaren goialdetik behera. Haur, gazte eta helduez osatutako danborradak festa doinuak ekarri ditu auzora, eta harekin batera jende asko elkartu da plazan. Laino eta zaparrada guztien gainetik, jaiez gozateko prest daudela erakutsi dute morlanstarrek. Igandea arte jai giroan murgilduko dira morlanstarrak. Irutxuloko Hitzak jaien lehen eguneko irudi sorta ederra bildu du. EGITARAUA: Ostirala 15 18:00 Jaien hasierako merienda. 19:00 Faroltxoaren piztea. 20:00 Danborrada auzoko kaleetan zehar. 21:30 Sardina jatea. 21:30 Haurren karaokea. 23:00 Helduen karaokea. Larunbata 16 10:30 Diana, buruhandi eta erraldoiekin. 11:00 Sukaldaritza txapelketa. 11:00 Haur jolasak. 12:00 Olinpiadak. 14:00 Herri bazkaria. 16:00 Musa 16:00 Galgo Leku elkartearen txakurrak. 17:00 Pailazoak. 18:00 Txokolate jana. 19:00 Poteo elegantea. 21:00 Afaria. 23:00 Berbena: 3gabe2 Igandea 17 09:00 Diana. 10:00 Pijama gosaria. 11:00 Haurrentzako Txirrindularitza proba. 12:00 Musika Eskolen emanaldia. 13:00 Sagardo dastaketa eta haurrentzako denbora pasak. [Gallery=189]