Jaime de los Rios sortzaile donostiarrak egonaldi artistiko bat burutuko du Wroclawen

Zubi digital, kolektibo eta irekia sortuko du Donostia eta Poloniako hiriaren artean, Twitter oinarri hartuta.

Lide Ferreira

2015/05/26

Donostia 2016ko Kultura zuzendari Xabier Paya eta Etxepare Euskal Institutuko zuzendari Aizpea Goenaga, Jaime de los Rios, Ainara LeGardon eta Eneko Gil artistekin batera. (Argazkia: Lide Ferreira)

Etxepare Euskal Institutuak eta Donostia 2016 Fundazioak sinatutako lankidetza hitzarmenari esker, Poloniako Wroclaw hirian egonaldi artistiko bana burutuko duten artistak ezagutzera eman dituzte gaur goizean. Jaime de los Rios donostiarrarekin batera, Ainara LeGardon musikaria eta Eneko Gil dantzaria izan dira hautatu dituzten sortzaileak. Donostia 2016ko Kultura zuzendariak azaldu duenez, egonaldi hauen helburua euskal sortzaile eta artisten lana mundura zabaltzea da: “Artisten mugikortasuna sustatu nahi dugu, baina baita Wrocklaw eta Donostiaren kulturen artean zubiak eraikitzea ere”. Etxepare Euskal Institutuko zuzendari Aizpea Goenagak zubiak eraikitzearen ideiarekin bat etorri da, “harreman eta aukera ugari lortzeko aukera ematen dutelako”. Hala, hiru sortzaileek ekaina eta uztaila artean 15-21 egun inguruko egonaldi bat egingo dute Wroclawen, euren proiektuak garatzeko. Ondoren, Poloniako hiriak antolatutako BASK jaialdian aurkeztuko dituzte, eta bertan ere iazko lehiaketa irabazi zuten beste hiru artistekin elkartuko dira. Wroclaw 2016an Donostiarekin batera Europako Kultur Hiriburu izango da. Hori dela eta, aurrerago, hiru artista poloniarrek Donostia bisitatuko dute ariketa bera egiteko. Bi komunitateren arteko komunikazioa Goenagaren arabera, lehiaketan parte hartzeko 30 proiektu baino gehiago jaso dituzte, eta guztiek kalitate handikoak izan dira. Hautatu dituzten hiruak oso desberdinak dira euren artean:

Jaime de los Rios donostiarrak elkarlanean oinarritutako Pidgi kultura plugin jarduera sortuko du, Wroclaw eta Donostiaren artean zubi digital, kolektibo eta irekia osatuz. Honela, eta Twitter erabiliz, hiritar guztiak protagonista eta sortzaile bilakatuko dira, irudiak eta hitzak elkartzen diren puntuan. Twitteren #Wroclaw2016 traolak erabiltzen dituen erabiltzaile oro proiektuko protagonista aktibo izango da, obraren sortzaile. Pigding-ak kode sinpletuak dira, elkar ulertzen ez duten bi komunitateren arteko komunikazioa ahalbidetzeko balio dutenak. Proiektu honetan sarea bera bilakatuko da komunikazio zubi, eta bi hirien arteko biztanleek sortuko dute proiektua.
Ainara LeGardon bilbotarrak bi hirietako soinuak jasoko ditu gidoi entzungarri bat sortzeko; ondoren, haren interpretazioa eskainiko du, zuzenean eta publikoaren aurrean. Soinu-arte piezak lanak ahotsa, objektuak eta gorputza bera batzen ditu, eta geltoki ezberdinetako bidaia egingo du. Bide osoan zehar oso presente izango ditu bi hirien arteko loturak eta elkar puntuak, baita bertako ohiturak ere.
Eneko Gil oreretarrak Bruno Schulz idazle, margolari eta artista grafiko poloniarraren bizitza eta obra gorpuztuko ditu, euskal dantza tradizionala eta garaikidea uztartzen dituen dantza-solo batean. Bruno. Kanela koloreko dendak izenburupean, Schulzen unibertsoa, margolanak, errealismo sinbolikoa eta pertsonaia bera dantzaren bidez islatuko ditu. Gainera, Gil Poloniako dantza folklorikoa ikasiko du eta hori ere bere lanean islatzen saiatuko da. Bestalde, jantziak eraldaketa irudikatuko du, metamorfosia oinarri hartuta.