Euskadiko Orkestra Sinfonikoak kontzertu kopurua 11ra handituko du datorren denboraldian

Donostian irailaren 28an hasiko da, eta 'Ederra eta Piztia' balletarekin amaituko dute.

Irutxuloko Hitza

2015/06/05

Euskadiko Orkestra Sinfonikoaren kartel berria. (Argazkia: Ane Urrutikoetxea)

Euskadiko Orkestra Sinfonikoaren kartel berria. (Argazkia: EOS)

Euskadiko Orkestra Sinfonikoak handitu egingo du bere ohiko kontzertu kopurua datorren denboraldian. Gaur aurkeztu du programa, eta Donostian 11 kontzertu eskainiko dituzte, iazko bederatziak gaindituz. Donostian irailaren 28an hasiko da denboraldi berria, eta Ederra eta Piztia balletarekin amaituko dute. Jean Sibelius konpositore finlandiarra omenduko du EOSek, haren Finlandia eta Kullervo obrak interpretatuz. Horrela, konpositorearen 150. urteurrena gogoratuko dute. Bestalde, maisu sinfoniko handiak izango dira datorren denboraldiko protagonistak, hala nola, Gustave Mahler, Anton Bruckner, Maurice Ravel, Sergeui Prokofiev, Ludwig Van Beethoven eta Piotr Ilitx Txaikovski. Euskal Herriko bi konpositoreren lanak ere estreinatuko dituzte, bata Luis de Pabloren Pensieri, azaroan, eta bestea Iñaki Estradaren …laino argidun arten… 2016ko ekainean.

Zuzendari berria garai berrietarako

Jun Maerkl orkestraren zuzendari berri bezala estreinatuko da denborladi honetan. Dena den, ez da orkestrarekin ariko den zuzendari bakarra izango, beste sei zuzendari gonbidatuko baititu EOSek: Aris Rasilainen, Jose Ramon Encinar, Christoph Konig, Ainars Rubikis, Robert Trevino eta Juraj Valcuha. Bestalde, izen handiko bakarlariak estreinatuko dira orkestrarekin, esate baterako, Tamar Beraia, Ingrid Fliter eta Alexander Lonquich pianistak, Jack Liebeck, Viviane Hagner eta Jennifer Koh biolin jotzaileak, Alban Gerhardt biolontxelo jotzailea eta Roberto Fabricciani flauta jotzailea. Denboraldiko programaren laburpena eta egitarau osoa hemen ikusi daitezke.