Antiguatarrak jai giroan murgildu dira dagoeneko, sua pizteko ohiturari itxaron beharrik gabe. Erramun Martikorenak eta Luberri abesbatzak bat egingo dute ostiralean, frontoian.
Dantzariek igandean egindako kalejira. (Argazkia: Aritz Sorzabal)
Gaskonia plaza, erdigune
Antiguako jaiak zerbaitengatik ezagunak badira, San Joan bezperagatik da. Hain zuzen ere, gau magiko horretaz gozatzeko elkartuko dira auzotarrak, asteartean. Buruhandi eta trikitilariek kaleak girotzen hasiko dira 19:00etan, eta luntxa egingo dute Plateron, 19:30ean. Kantu Jirak euskal kantekin beteko ditu kaleak, 20:00etan. Une magikoa gerturatu ahala Gaskonia plazan elkartzen hasiko dira, 21:30ak aldera. San Joan sua piztu, suaren konjuroa egin eta soka dantza herrikoia dantzatuko dute. Leire Zumeta eta Amaia Arzarekin erromeria hasiko da 22:30ean, Gaskonia plazatik. Hor ez da festa amaituko. Izan ere, hilaren 26an bukatuko da jaien egitaraua, XXVI. Pala Txapelketaren finala jokatuko dute arratsaldean. Txemi Lasarte auzotarraren izena darama txapelketa, berak antolatu zuelako urte luzez. Antiguako jaiak amaituta, beste batzuei egokituko zaie txanda: Sanpedroak ospatuko dituzte Igeldon eta sanmartzialak, Altzan.El Drogas eta Flitter, ostiralean, Herreran
Antiguan ez ezik, Herreran ere egongo da zer ospatu egunotan, San Luis jaiak direla eta. Festen hasiera atzorako zegoen iragarrita, txupinarekin. Iaz festetako abestia estreinatu zuten jaietan; aurten, letrari musika jarri dioten lagunen aurkezpena da berritasuna. Hain justu, auzotar talde batek txaranga bat osatu du festetako egunak girotzeko: Tanttaka. Musikarekin jarraituz, kontzertu erakargarriak izango dira aurten ere. 2014ean Reincidentes taldea ekarri bazuten, oraingoan ere rockzale amorratuenak asetuko dituzte Enrique Villarreal El Drogas, Flitter eta Monte del Oso taldeekin. Gaur izango da kontzertua, 22:00etan. Bihar, berriz, bisita berezi bat izango dute haurrek: Irrien Lagunak-eko Ane Pirata etorriko da auzora, 17:30ean.Sagardoarekin eta zikiro jatearekin agurtu dituzte jaiak Larratxon
Hainbat jarduerekin agurtu zituzten festak Larratxon, igandean. Auzotarrek jai gunea bete zuten eguerdian, eguraldiak aukera eman zuela baliatuta. Sagardo Egunaz gozatu zuten horrela, eta, egarria asetuta, txistorra pintxoak eta zikiro jatea izan izan zituzten aukeran. Gaztetxoak zaldiko-maldikoetara igo ziren, eta zenbaitek ibilgailu zaharren erakusketa bisitatu zuten ikastetxeko jolastokian.
