Eskuineko gobernua osatu dute EH Bilduren esanetan
EAJ eta PSE-EEren itunak Donostia 'hiri kosmetikoan' bihurtuko duela salatu du EH Bilduko bozeramaile Amaia Almirallek.
EH Bilduko bozeramaile Amaia Almirall eta zinegotzi Axier Jakak gobernu berriaren balorazioa egin dute. (Argazkia: Ane Urrutikoetxea)
Ekimenak bereganatzea leporatu dute
Itun berriak sortutako zalantzez gain, Almirallek salatu du EAJ eta PSE-EEren gobernuak aurreko legegintzaldian onartu eta ia amaitutako proiektuak bere egin dituztela: ” Gobernu berriak amnesiarekin jokatu du, dagoeneko onartuta eta martxan dauden proiektuak bere eginez, esate baterako, Altzako kiroldegi berria eta uholdeen aurrean hartutako neurriak. Hala, dena eginda dagoenean azaldu dira, denon artean adostutako proiektuak faltsuki beregantuz”. Parte hartzea ez aipatu izana ere salatu du bozeramaileak, eta horrekin batera euskara eta kultur aniztasuna programatik desagertu direla adierazi du: “Sail batzuk erabat ezabatu dituzte, eta beste batzuen inguruan hitz bakar batzuk besterik ez dituzte aipatu, esate baterako, parte hartzea desagertu egin da, eta baita kultura aniztasuna ere; euskaren inguruan bestalde, zehaztapen gutxi egin dituzte”. Etxebizitzen salerosketaren aldeko apustua egingo du gobernu berriak Almirallen ustetan, gizarte politika bazter utzita, eta Eusko Jaurlaritzak etxebizitzak bereganatzeko neurriaren aurka egin izana gogora ekarri du. Bestalde, azpiegitura handietan inbertsioa egiteko arazorik ez izatea salatu du: “Harrigarria da nola ez duten diru arazorik izango Donostiako topoa metroan bihurtu eta AHTa hirira ekartzeko”. Bozeramaileak zezenketen gaia aipatuz amaitu du, esanez gobernuak hartutako lehen neurria zezenketak hirira bueltatzea izan dela: “Harrigarria da gobernuaren lehen erabakia zezenketak onartzea izatea, Chopera etxeari instalazio publiko baten erabilera luzatuz, bertan animaliak torturatu ditzaten”.
