Alderdiak hiru interpelazio jarriko ditu; kezka agertu du hainbat gairen inguruan.
Interpelazioak aurkeztu ditu EH Bilduko zinegotzi Josu Ruizek. (Argazkia: Ane Urrutikoetxea)
gaur, udal gobernuari azalpenak eskatuz. Horrela,
Altzako kiroldegiaren etorkizunaz galdetu du
EH Bilduko zinegotzi Josu Ruizek. Amara Berri eta Egiako merkataritza sustatzeko plangintzaz ere galdetu du, eta baita hondartzan futbolean berdintasuna sustatzeko neurriez ere.
Ruizen esanetan, udal gobernu berriak ez du argitu Altzako kiroldegi berriaren proiektua aurrera doan, eta interpelazioa egin dio
Enrique Ramos Hirigintza, Etxebizitza eta Hiriarentzako proiektu zinegotziari, berrikuntzaren egoeraz erantzun dezan Gune Publikoetako Batzordean. Zinegotziak azaldu duenez, aurreko legegintzaldian Altzako kiroldegi berriaren oinarrizko proiektua eta exekuzio proiektua egiteko ideia lehiaketaren oinarriak onartu ziren 2014ko martxoaren 14an. Lehiaketak hiru hilabeteko gehieneko epea ezarri zuen oinarrizko proiektua egiteko, eta beste lau, exekuzio proiektua egiteko oinarrizko proiektua onartzen denetik zenbatzen hasita.
Kiroldegia eraberritzeko oinarrizko proiektua Chocarro, Herranz, Tabuenca eta Leachek osatutako UTEari esleitzea erabaki zuten 2015ko urtarrilaren 9an. Kontratuaren esleipena 2015ko urtarrilaren 14an jakinarazi zen, eta
UTEak, 2015ko otsailaren 6ko idatziz, epea etetea eskatu zuen, partaidetza prozesua abian zelako. Hori dela-eta, epea maiatzaren 4ra arte luzatu zieten.
Ondoren, partaidetza prozesuari esker, waterpolo eta gimnasia erritmikoa praktikatzeko beharrezkoak diren ezaugarriak gehitu zituzten proiektuan. Azken prozesu horren harira, Ruizek adierazi du
EAJk eta PSOE-EEk sinatutako akordioan ere bi kirol hauetarako azpiegiturak jartzea aurreikusi dutela, aurreko proiektuan dagoeneko aurrikusita egon arren: “Ulertezina da, aurreko Udal Gobernuak partaidetza prozesu baten bitartez onartutako proiektua delako”.
Zinegotziaren arabera, exekuzio proiektua oinarrizko proiektua onartu eta lau hilabeteko epearekin aurkeztu behar da: “Dena den, oraindik ez dakigu epeak betetzen ari diren ala ez. Gogoratu behar da aurreko gobernuaren programaren arabera, abendurako exekuzio proiektua aurkeztua beharko lukeela, obren esleipena 2016ko urtarrila-otsailean egiteko eta obrak ekainean hasteko. Beraz, Altzarentzako oinarrizko proiektu hau zertan den jakin nahi dugu”.
Berdintasuna eta merkataritza ere, airean
Amara Berriko eta Egiako merkataritza sustatzeko proiektuaz ere galdetu du Ruizek, eta kasu horretan, interpelazioa Ernesto Gasco Ekonomia, Merkataritza, Ostalaritza eta Turismo zinegotziari egin diote, Pertsonen Batzordean erantzun dezan. EH Bilduko zinegotziak azaldu duenez, Donostian merkataritza sustatzeko Eusko Jaurlaritzaren 2014ko diru-laguntza deialdiaren haritik,
51.750 euro egokitu zitzaizkion udalari, besteak beste, Amara Berrin eta Egian merkataritzaren plangintza bana egiteko. Aurtengo urtarrilean diagnostikoa bukatuta zegoen, eta plangintza, nahiko aurreratuta: “Ez da oraindik abian jarri, ordea. Plangintza hauek garrantzia dute enplegua sortzeko eta ekintzailetasuna sustatzeko diru-laguntzak aurreikusiak baitituzte: zergatik ez diren gauzatu jakin nahi dugu, eta baita zenbat diru bideratuko duten ere”.
Azkenik, 2014-2015 denboraldian
neska eta mutilen artean abian jarritako berdintasun irizpideei esker, neskek hondartzako futbolean jokatu zutela historian lehen aldiz gogorarazi du EH Bilduko zinegotziak, eta horri eutsiko dioten ere galdetu dio udal gobernuari.
