Euskararen erabilera babesteko eskatuko du EH Bilduk
Amaia Almirallek bi interpelazio aurkeztu ditu, hizkuntza irizpideak errespetatu daitezen.
Euskararen erabilera bermatzeko eskatu du EH Bilduko bozeramaile Amaia Almirallek. (Argazkia: Ane Urrutikoetxea)
Softbol taldeari udalak eskainitako plaka. (Argazkia: Ane Urrutikoetxea)
Egunerokoan ere irizpideak urratuta
Horrez gain, Almirallek gogoratu du udaleko zinegotzi guztiak ez direla euskaldunak, eta horrek arazoak sor ditzakeela adierazi du: “Gaur egun, udal gobernukide guztiak ez dira euskaldunak, eta hori kezka sorburu bihurtu da, barrura zein kanpora begira, hiriak onartuak dituen hizkuntza irizpideen erabilerari dagokionez. Horregatik, EH Bilduk bi galdera hauek egin dizkio Eneko Goia alkateari: Nola ziurtatuko dute bi hizkuntzen erabilera, Donostiako udalerriaren irizpideen baitan, ahozkotasunari dagokionez, herritarrekiko tratu zuzenean? Eta, nola burutuko dira bilerak hiritar euskaldun eta gobernukide erdaldunen artean? Zer gertatuko da udalean euskaraz lan egiten ari diren atalekin -Euskara Zerbitzuarekin, adibidez- berezko zinegotzia (Miren Azkarate) ez dagoenean, eta berari dagokion ordezkoa (Juan Ramon Viles) erdalduna izanik?”. EH Bilduko zinegotziaren ustez, normalizazioan orain arte egindako bidea jarraitu behar du udalak: “Gaur egun, hizkuntza normalizazioan pausoak ematea da erronka nagusia. Eta, hain zuzen ere, Donostiako Udalak, norabide horretan, lan sakona eta handia egin du”. Aurreko legealdian euskararen erabilerari bultzada handia eman zitzaiola gogoratu du Almirallek, eta atzerapausorik ez egiteko eskaera egin dio udal gobernuari, oraingo egoerari eustearekin ez dela nahikoa adieraziz: “EH Bilduk ez du euskararen normalizazioan atzera pausorik onartuko”.
