Ondarretan zinema eta ikuskizunak eskainiko dituzte Aste Nagusian
Antigua eta hondartza espazioak berreskuratuko dituzte aurten; hirian 400 ekitaldi antolatu dituzte abuztuaren 8tik 15era.
Ondarreta hondartzan hainbat ikuskizun eskainiko dituzte Aste Nagusian. (Argazkia: Ane Urrutikoetxea)
Eskola eta Easoren omenez
Aste Nagusia abuztuaren 8an hasiko da, ohiko kanoikadarekin udalatxean, 19:30ean. Artillero abestiaren abeslari bereziak egongo dira aurten, Ama Birjinaren Eskola Elkartea eta Easo abesbatza omenduko baitituzte beren 75. urteurrenean. Ekitaldiaren aurretik, Los Bebés de la Bulla, Gauerdi eta Taupada taldeek jarriko dute giroa, eta herritarrei kanoikadara etortzeko gonbita egingo diete. Ekitaldiaren ondoren, ROCK KALEAN taldeak jarriko du giroa, Bulebarrean. Ondoren, aste guztian zehar adin eta zaletasun guztiak asetzeko moduko jarduerak egongo dira hiria; erraldoi eta buruhandien konpartsa egunero ibiliko da hiriko auzoetan barrena (San Telmon ere bisitatu ahalko dira); zezensuzkoen entzierroa; su artifizialen nazioarteko lehiaketa; erromeriak; herri kirolak (Igeldoko Harria, Urrezko Kopa); Urrezko Kopa Donostiako hipodromoan; Piraten abordatzea abuztuaren 10ean; euskal dantzak Konstituzio plazan (Gainera, Eskolaren 75. urteurrena ospatzeko, 140tik gora dantzari bilduko dira); musika banden emanaldia Bulebarrean; DJ gauak Kursaaleko terrazetan; antzerkia Gipuzkoa plazan; zezenak Illumben; eta Urumeako arrantza lehiaketa, besteak beste. Aste Nagusiak elementu berriak izango ditu ere. Horrela, abuztuaren 8ko txistularien alardean Jose Mari Usandizaga omenduko dute, 20:30ean, Konstituzio plazan. Aurten, gainera, lehiaketa gastronomiko bat izango da gazteentzat; bertako produktuak erabilita lehiatu beharko dira, Bretxan, abuztuak 9. Horrez gain, merenge gerra egingo dute Zurriolan, eta bertsolariak egongo dira Aste Nagusian; saio berezi bat egingo dute abuztuaren 14an, suen ondoren, Konstituzio plazan, emakume bertsolariekin bakarrik. Kirolerako tartea ere egongo da, Gaueko Jai Lasterketarekin; erdialdetik atera eta Ondarretaraino, festa giroan korrika egiteko aukera izango da. Modalitate guztietako kirol probak eta bigarren eskuko eta sortzaile berrien azoka ere egingo dituzte jai guneberri batean, Gernikako Arbolaren pasealekua, hain zuzen ere. Aste Nagusiko azoka eremua, ohi denez, Pasealeku Berrian egongo da, eta haurrentzako eremua, berriz, Koldo Mitxelena kulturune inguruan. Egun handia, abuztuaren 15a izango da, Aste Nagusiko azken eguna, hain zuzen. Aurreko urtetan, jaia su festekin amaitu izan da, baina aurten, larunbata izanik, zezensuzkoen entzierroa egingo dute, eta baita kontzertu bat ere Saguesen, Remember Queen World Tour izenekoa; Queen taldeko Freddie Mercury abeslariari omenaldia egingo dio Piero Venery talde italiarrak. Azkenik, Kursaaleko terrazetako musika goizeko 03.30a arte luzatuko da. Aipatzekoak dira ere Saguesen aurten egingo dituzten kontzertuak; aste guztian zehar, gauero, honako taldeak egongo dira bertako eszenatokian, hurrenez-hurren: Kalakan eta Oreka TX, Rosario, Carlos Jean Coca-Cola Gira Live Experience, Urtz eta Hesian, Skakeitan eta Bad Manners, Macaco, Berri Txarrak eta Queen taldeari egingo dioten omenaldia.Eraso sexistarik gabeko jaiak
Eneko Goia alkatearen esanetan, programa anitza eta zabala antolatu dute aurten, eta herritar guztiei ondo pasatzeko deia egin die, errespetuz: “Bi eskaera egin nahi ditut; bata, errespetuz jokatzea eremu guztietan, jaiak denontzat direlako; eta bestea, sexu erasorik gabeko jaiak aldarrikatu nahi ditut, horrelako jarrera eta erasorik ez gertatzeko deia eginez”.
