Aste Nagusi Pirata piztu dute

Piratek Aste Nagusi "koloretsu eta anitzaz" gozatzera deitu dituzte herritarrak

Nerea Lizarralde

2015/08/09

Xibaroen kofradiako kide bat, Ezkila kapitaina eta Matti portura iritsi diren unea. (Argazkia: Nerea Lizarralde)

Gaur iluntzean jaurti dute piratek jaietako txupina, eta Aste Nagusi Pirata piztu dute. Ohi bezala itsasontziz iritsi dira Ezkila kapitaina -aurten lehen aldiz panpin itxura eman diote- eta kofradia guztien ordezkariak. Kaian barrena txarangaren musikaz girotuta eta pirata guztien babesarekin iritsi dira Portaletaraino. Ezkila kapitaina, Xibaroen kofradiako kide bat eta Matti -aurten IRUTXULOKO HITZAri egokitu zaio pertsonaia berezi hau izatea- izan dira Portaletan jende andanaz inguratuta. Xibaroen kofradiako kide batek esan ditu jaietako pregoiaren lehen hitzak, beraiei egokitu baitzaie aurten Ezkilaren bidelagun izatea: “Urteak dira Aste Nagusi euskaldun, parekide eta parte hartzailea eraikitzen hasi ginenetik. Denetik pasa zaigu bidean. Debekuak, ekaitzak eta abar luze bat. Beti egin dugu aurrera, indarrez eta gogotsu, hau zela bidea argi baikeneukan”. Bidean galdu dituzten piratak ere ekarri dituzte gogora festen lehen egunean, eta topa egin dute haien alde. IRUTXULOKO HITZAk hartu du ondoren hitza, Matti pertsonaia gisa. Aste Nagusi Piratarekin batera hamar urte bete dituela azaldu du, eta aurrerantzean hasierako helburuei tinko eutsiko diela adierazi du : “Herri mugimenduari ahotsa ematea; auzoen egunerokoari tartea egitea; tokian tokiko informazioa zabaltzea; eta euskal hiztunak ez ezik, erdaldunak ere Donostiako plazara ekartzea”.