Parte Zaharreko kaleetan barrena zabaldu dute jaia Piratek

Urgullen egitekoa zuten erromeria lekuz aldatu dute, eguraldi iragarpen txarrarengatik

Estitxu Zabala

2015/08/09

Aquarium pareraino hurbildu dira piratak, kalejiran. (Argazkia: Estitxu Zabala)

Urgullen egin izan dute Piratek euren erromeria aurreko urteetan, baina aurten, Parte Zaharreko eta Kaiko kaleetan barrena zabaldu dute jaia, eguraldi iragarpen txarraren ondorioz. Edonola, Aingura, Pirata Bihurriak eta Sardiñerak kofradietako kideen eskutik, ederki pasa dute goiza bertaratutako guztiek. Piraten aurtengo gune berria da Lasta, La Flamenkatik metro gutxitara dago, kaian, eta bertatik abiatu da erromeria, 11:45 inguruan. Trikitilarien erritmoan joan dira festazaleak kalejiran, Kaian barrena, eta geldialdi pare bat egin dituzte, dantzatzeko. Kalejira, fandangoa, arin arina… denak balio zuen gaurkoan, gorputza mugitu eta ongi pasatzeko! Berriro ere Lasta gunera itzuli dira dantzan, eta bertan, txikiek, musika instrumentuak egin dituzte, materiala berrerabiliz. Haurrek eta helduek ederki igaro dute goiza, eta Trinitate plazan elkarrekin bazkaltzeko asmoa zuten, ondoren, erromeriarekin jarraitzeko. Bukatzeko, Eskifaia kofradiak lehen aldiz Akelarrea egingo du, 19:00etan, Lastan.

Azken bideoak