Gizonezkoen San Juan eta San Pedroren traineruak, uretatik ateratzeko prest. (Argazkia: Estitxu Zabala)
San Miguel Ligan nagusi izan da Hondarribia, denboraldian zehar. Kontxako Banderara sasoiko iritsiko zela jakina zen, baina Bermeo aurkari gogorra izango zuela ere ez zuen inork zalantzan jartzen. Bizkaitarrek baieztapen hori berretsi dute, sailkatze estropadan denborarik onena egin eta gero. 90 ehunenekoen tarteagatik eskuratu dute lehen postua; horrenbestez, datozen bi igandeetako lehia estu joango dela aurreikusi daiteke.
Lehen ziabogan Hondarribiak ezarri du denborarik onena. Itzulerakoan, berriz, Bermeok 9 segundoko aldeari buelta eman dio; Kontxako Banderan edozer gerta daitekeenaren adibide.
Orio gertu izan dute bi traineru faboritoek. Horiak hirugarren postuan sailkatu dira, 4 segundora. Kaiku laugarren izan da, 7 segundora; San Pedro bosgarren, 18 segundora; Tiran seigarren, 20 segundora; eta San Juan zazpigarren, 24 segundora. Azken hauek 22 ehunenekoengatik lortu dute sailkatzea, Astilleroren kalterako. Gizonezkoen zazpi traineru hauek lehiatuko dira Kontxako Banderaren bila, Donostiarrarekin batera.
Emakumeei dagokienez, ez da ezusterik izan sailkatze estropadan. Euskotren Ligako lau traineruek lortu dute igandean lehiatzeko txartela: Zumaia, Hibaika, Orio eta San Juan. Nabarmentzekoa izan da zumaiarren estropada bikaina, alde handia atera baitute, lehen ziabogatik. San Juan, iazko txapelduna, sailkatzearekin konformatu egin da, eta ez ditu indarrak xahutu.
Donostiarra-Arraun Lagunak 50. urtemuga taldeak estropada duina egin du, eta zazpigarren postuan amaitu du, 12 minutu eta 22 segundoko denborarekin, lehiatutako hamaika traineruen artean; hori bai, etxekoek urruti bukatu dute lehen lau traineruetatik. Hauek beste maila batean daudela erakutsi dute.
Gizonezkoak:
1-Bermeo, 20:10
2-Hondarribia, 20:10
3-Orio, 20:14
4-Kaiku, 20:17
5-San Pedro, 20:28
6-Tiran, 20:30
7-San Juan, 20:34
Emakumezkoak:
1-Zumaia, 11:12
2-Hibaika, 11:27
3-Orio, 11:27
4-San Juan, 11:31
5-Cabo, 11:52
6-Getaria-Zarautz, 11:57
7-Donostiarra-Arraun Lagunak 50. urtemuga, 12:22
8-Chapela, 12:36
9-Hernani, 12:37
10-Oiartzungo Itsaslapurrak, 13:05
11-Colindres, 13:23
