Emily Watson aktore britainiarrak jasoko du Donostia Saria

Zinemaldia irailaren 18tik 26ra izango da eta Benicio del Toro, Sienna Miller eta Ricardo Darin hirian izango dira, besteren artean.

Estitxu Zabala

2015/09/04

Jose Luis Rebordinos Donostia Zinemaldiko zuzendariak eman du Donostia Sariaren berri; Zuzendaritza Batzordeko Maialen Beloki eta Joxean Fernandezekin batera eman du prentsaurrekoa. (Argazkia: Estitxu Zabala)

Zinezaleek espero zuten albistea iritsi da, Emily Watson aktore britainiarrak jasoko du Zinemaldiko Donostia Saria, “bere ibilbide ezagunagatik”. Halaxe jakinarazi du Jose Luis Rebordinos Zinemaldiko zuzendariak, gaur goizean jaialdia aurkezteko egin duten prentsaurrekoan, Londres hotelean. Watsonek irailaren 25ean jasoko du garaikurra, Kursaaleko Auditoriumean egingo duten galan. Izan ere, 63. Donostia Zinemaldia, irailaren 18tik 26ra izango da, eta beste aktore nabarmen batzuk ere izango dira hirian egun horietan: Sienna Miller, Tom Hiddleston eta Luke Evans (High Rise), Ellen Page (Freeheld), Emily Blunt eta Benicio del Toro (Sicario), Tim Roth (600 millas eta Chronic), Louise Bourgoin (Les chevaliers blancs), Karin Viard eta Isabelle Carre (21 nuits avec Pattie), Imanol Uribe, Elena Anaya, Eduard Fernandez eta Jose Luis Garcia Perez (Lejos del mar), Alejandro Amenabar (Regression / Regresión), Ricardo Darin eta Javier Camara (Truman) eta Barbara Lennie (El apostata), besteren artean. Alex de la Iglesia, Mi gran noche filmeko aktoreekin etorriko da: Raphael, Carlos Areces, Carolina Bang, Mario Casas, Carmen Machi, Santiago Segura, Hugo Silva eta Blanca Suarez. Eta bertan izango da, halaber, Hotel Transylvania 2 filmaren gaztelaniazko bertsioa bikoiztu duen aktore taldea: Alaska, Clara Lago, Dani Martinez, Santiago Segura eta Mario Vaquerizo.

Emily Watson aktorea.

Emily Watson Islingtonen jaioa da, Erresuma Batuan, 1967an. Drama Studio London izeneko eskola entzutetsuan ikasi zuen interpretazioa, unibertsitate ikasketak bukatu zituenean. Antzerkian hasi zuen bere ibilbide profesionala, eta zineman ospetsu bihurtu zen bapatean: Lars von Trier-en Breaking the Waves(1996) filmean Bess McNeill pertsonaia izan zen, eta sari mordoa irabazi zituen horren harira, baita Oscar sarietarako eta Urrezko Globorako izendapenak. Handik bi urtera, azken bi sari horietarako izendatu zuten berriro, Hilary and Jackie filmean Jacqueline du Pre biolontxelo-jotzailea interpretatzeagatik. Handik aurrera, bere ibilbide arrakastatsua dela eta, gaur egungo zinemagile ezagunenetako batzuen filmeetan lan egin du: Robert Altmanen Gosford Park (2001), John Hillcoat-en The Proposition (2005), Jim Sheridan-en The Boxer (1997) eta Steven Spielbergen War Horse (Gerra zaldia, 2011), Stephen Hopkins-en The Life and Death of Peter Sellers (2004), Chris Noonanen Miss Potter (2006), edo James MarshenThe Theory of Everything (2014). 2002an antzerkira itzuli zen, eta Sam Mendes-ek zuzenduriko bi obratan lan egin zuen. 2015ean Britainiar Inperioko Ordenako Ofizial izendatu zuten, antzezpenaren arteari eskainitako zerbitzuengatik.

Pilar Olaskoagari eskainia

Jose Luis Rebordinosek azaldu duenez, aurtengo Donostia Zinemaldia Pilar Olaskoagari eskainiko diote. Zinemaldiko idazkari nagusia izan zen 30 urtez, eta aurten hil da, 87 urte zituela. Hala, aurtengo Zinemaldian, bereziki egungo gaiekin lotura duten fimeek garrantzia izango dutela azaldu du zuzendariak: “Egun hauetan etengabe ikusten ari gara Europara heltzen saiatzen ari diren iheslarien irudiak. Haur baten gorpuaren irudiak munduari bira emateari esker, badirudi gobernuak mugiarazi direla, eta hainbat lagunek euren etxeak eskaintzeko balio izan duela”. Hala, aurtengo Zinemaldia egungo errealitatetik sekula baino gertuago egongo da: “Aurten garrantzitsuena errealitateaz diharduen zinema izango da”. Hala, No estamos solos eta Lejos del mar filmak aipatu ditu, esaterako. “Familien larritasunen inguruko eta gazteen arazoei buruzko pelikula asko izango ditugu aurten”, gehitu du Rebordinosek.

Sarrerak

Zinemaldirako sarrerak lortzeko, bi data aipatu dituzte. Batetik, ostirala, irailak 11, 9:00etan: Sail Ofizialeko galetarako sarrerak jarriko dituzte salgai (Inaugurazioa, Donostia Saria eta Itxiera), Internet bidez; gainerako kanaletan, irailaren 14an, 9:00etan. Bestetik, igandea, irailak 13, 9:00etan: gainerako saioetarako sarrerak jarriko dituzte salgai, kanal guztietan. Zinemaldi Plazako leihatiletan (Kursaaleko beheko solairua) eta Kursaaleko leihatiletan (Sail Ofizialeko abonamenduak eta 10 sarreretatik beherako erosketak), eta Interneten (www.sansebastianfestival.com eta www.kutxabank.net). Sarrerak beste leku batzuetan ere erosteko aukera egongo da: Viktoria Eugenia Antzokia, Tabakalera, Principe zinema-aretoak (hilaren 19tik aurrera) eta Trueba eta Antiguo Berri zinema-aretoak (hilaren 20tik aurrera). Antonio Elorza Belodromoko sarrerak Anoetako Estadioko 23. leihatilan ere jarriko dituzte salgai, saioak hasi baino bi ordu lehenago.

Epaimahaikideak

Epaimahaikideak zeintzuk izango diren ere argitu duten gaurko agerraldian.

Kutxabank Zuzendari Berriak saiaren epaimahaia: Diego Lerer (presidentea, Francine Brucher, Desiree de Fez, Olivia Stewart, eta Edgar Tenembaum.
Horizontes Sariaren epaimahaia: Agustina Chiarino (presidentea), Fran Gayo, eta Ruben Otxandiano.
Euskal zinemaren Irizar Sariaren epaimahaia: Jose Mari Goenaga (presidentea), Maria Elorza, eta Dolores Meijomin.
Zinema ikasleen nazioarteko topaketetako epaimahaiburua: Benedikt Erlingsson (presidentea).
Beste begirada epaimahaia: Elena S. Sanchez (presidentea), Marian Alvarez, eta Begoña del Teso.