Eneko Goia: "Tabakaleraren irekierak Egiako ingurua hobetuko du"

Donostiako alkatea Tabakaleran izan da, gunearen irekiera ekitaldia baino lehen.

Ane Urrutikoetxea

2015/09/08

Eneko Goia Donostiako alkateak Tabakalera bisitatu du. (Argazkia: Donostiako Udala)

Eneko Goia Donostiako alkatea Tabakaleran izan da gaur, irekiera eguna baino lehen. Tabakalerako zuzendari Ane Rodriguezekin eta Jon Montero arkitektoarekin batera bisitatu du gunea, obren amaiera ikusteko. Alkateak azpimarratu du Tabakaleraren irekierak Egiako ingurua hobetuko duela, eta ziur dagoela ez diela donostiarren itxaropenei kale egingo. Goiaren esanetan, Tabakalerak ez die hotz utziko hiritarrei: “Nik ez dut argituko Tabakalera barruko misteriorik, hori bihar gertatuko da. Hori bai, ona da hiritarrek jakinmina izatea eta, beraz, Tabakalera barruan dagoena ikusteko gogoa izatea”. Bestalde, alkateak adierazi du Tabakaleraren irekierak Egiako ingurua hobetuko duela: “Eraikinaren inguruan zegoen hesia kenduta, Mundaizeko bidea zabalagoa izango da. Hala ere, bideak baditu bere mugak; etorkizunean muga horiei helduko diegu”. Eraikinaren ondoan Nestor Basterretxea plaza egin dute (aurreko legealdian aukeratu zen izena) eta bertan izango da Tabakaleraren sarrera nagusia. Goiak azaldu duenez, Nestor Basterretxea plaza irekitzeak Egiako pasabidea hobetuko du, laburragoa izango baita eta sarreratik pasabidearen irteera ikusiko delako: “Hori funtsezkoa da segurtasuna bermatzeko; gainera, pasabide berriak Egiara joateko irisgarritasuna hobetuko du”.

Espainiako Gobernuarekin bilera, hilaren 22an

Tabakalerak ateak irekiko dituen arren, inguruko lanak ez dira amaitu; hain zuzen ere, inguruaren urbanizazioa amaitzeko Blas de Otero plaza birmoldatuko du udalak etorkizunean. Gainera, hilaren 22an Espainiako Gobernuko Sustapen zinegotzi Ana Pastorrekin bilduko da Goia, trenbide gainetik pasabide baten bitarteko sarrera egiteko bahimenaz hitz egiteko: “Betetzeko zaila izango den ametsa da, baina, hala ere, ezin dugu ahaztu. Izan ere, hiritarrek erabili ahal izango luketen plaza erraldoia egin ahal izateak eta, bertara, geltokiaren beste aldetik sartu ahal izateak, eraikina ingurura gehiago hurbilduko luke.”

EH Bilduk eskatu du hiriko kultur ekosistema babesteko

Tabakaleraren irekieraz mintzatu da ere EH Bilduko ordezkari Amaia Almirall. Alderdia “pozik” dago gunearen irekierarekin, baina “kezka” ere agertu du, erakundeak hiriko kultur ekosistemaren zati handi bat hartuko duelako: “Tabakalera gorabehera handiak jasan dituen proiektu garrantzitsua da; gatazka ugari izan dira bere inguruan, eta edukiaren zilegitasunaren inguruan kritiak entzun zituen aurreko legegintzaldiak. Orain, ateak irekitzera doa, edukia baduela erakutsiz; baina ezin dira hiriko kultur ekosistemaren gainontzeko elementuak ahaztu, hauskorrak direlako”.