Zinemaldi Alternatiboa egingo dute hilaren 24tik 26ra
Kortxoenea gaztetxeari buruzko 'Irautea sortzea delako' dokumentala estreinatuko dute jaialdian.
Ez dakite ziur non egingo duten, baina badakite, egin egingo dutela. Groseko gaztetxean egin nahi dute Zinemaldi Alternatiboa, baina eraisteko arriskuan dagoenez, azken unerarte itxaron beharko dute bertan egin ahal izango duten jakiteko. eta Badakite ere zer ekarriko duen aurtengo Zinemaldi Alternatiboak.
Hiru dokumental emango dituzte. Kataluniaren prozesu soberanista mugimendu libertarioaren ikuspuntutik jorratuko du Radikales Libres filmak. Jakue Pascualek eta Alberto Peñalbak azaroaren 9ko kontsultaren aurreko egunetan grabatutako dokumentala da.
Temps de CanVi(e)s dokumentalak Bartzelonako Can Vies autogestionatutako zentroaren desalojoak piztu zituen istiluak eta gatazkaren inguruko gogoeta ekarriko du Donostiara. Egun horien kronikaz gain, hainbat elkarrizketa biltzen ditu filmak. David Fernandez, Ferran Aguilo eta Elba Mansilla elkarrizketatu dituzte filmean, baita Can Vies-en aurkako bizilagunak eta Jordi Marti zinegotzia. DateCuenta zinema eskola eta elkarteko irakasle batek eta lau ikaslek egin dute ikus-entzunezko hau.
Dokumentalaren filmaketaren une bat, Donostiako Piraten bozeramaileak elkarrizketatzen. (Argazkia: Lide Ferreira)
