Uliako Zemoria 20ko eraikina proposatu du Bilduk Kortxoenearen ordezko gisa

Eraikina udalarena da eta Hezkuntza Sailari egindako lagapena amaitua dago.

Agurtzane Altuna

2015/09/22

Zemoria kaleko eraikin honi erabilera aldatzea proposatu du Bilduk. (Argazkia: EH Bildu)

EH Bilduko Axier Jaka eta Ricardo Burutaran zinegotziak prentsaurrean agertu dira gaur Kortxoenea auzia “desblokeatzeko” proposamen bat aurkezteko. Izan ere, euren ustez irtenbideak badaude, eta alkatearen ardura da gaztetxeko gazteekin hitz egin eta irtenbide errealak eskaintzea. Bilduk aurreko legealdian landu zuen proposamen bat jarri du mahai gainean: Uliako Zemoria kaleko 20. zenbakian dagoen eraikina proposatu du gune autogestionatu gisa erabiltzeko eta inguruko proiektu sozio-kulturalak biltzeko; tartean Kortxoeneako jarduerak. Eraikin hori udalarena da berez, baina 2000. urtean Eusko Jaurlaritzako Hezkuntza Sailari utzi zitzaion 10 urterako. Gaur egun, Uliako institutua dago bertan, baina lagapena amaiturik legoke. Gainera, Jakak adierazi duenez Hezkuntza Sailak zerbitzu hori bertatik kentzeko asmoa du. Aurreko gobernuak zortzi bilera egin zituen Eusko Jaurlaritzako ordezkariekin eraikinaren erabilera aldatzeko. Hitzarmen zirriborro bat ere egina zuten, baina Jakaren arabera, ez dakite negoziaketa horiek zertan diren orain. Kortxoeneari irtenbide bat ematea “borondate politiko kontua” dela esan du Jakak, eta alkateak nahi badu eraikina berreskuratzeko urratsak egin ditzakeela.

Udala eta Kortxoenearen arteko elkarrizketa

Eneko Goiaren arabera, Kortxoeneako gazteekin harremanetan dago udala, eta dagoeneko bilera bat egin dute. Hala ere, alkateak jakinarazi duenez, igande goizean gaztetxearen eraisketaren aurka protesta egiteko 50 bat gazte Tabakalerako atarian sartu ziren. Ez zuten kalte larririk eragin eta polizia heltzerako euren kabuz alde egin zuten gazteek. Estropadetako lehen asteburuan Lasala plazako udal eraikinean ere antzerako protesta ekintza bat egin zutela gaineratu du. Horrelako portaerarik ez dutela onartuko esan du Goiak, eta jarrera horrekin jarraitzen badute elkarrizketak eten beharko dituztela ohartarazi du.

Erasoak ukatu dituzte

Kortxoenea gaztetxeko kideek, ordea, alkatearen salaketa gezurtatu dute. Eurek ez dutela Tabakalerako gertaerekin zerikusirik jakinarazi dute ohar bidez. Areago, gai honen inguruan ika-mika piztuta gaur arratsaldean udal ordezkariekin egitekoak ziren bilera zapuztu nahi izan dutela uste dute. Horregatik, “guztiontzat onuragarria den irtenbide bat bilatzeko bidean oztoporik ez izateko bazterrik ez nahasteko” eskatu dute.