Xanpainarekin ospatu dute hamargarren urtemuga

San Martin Merkataritza guneko langileek euren bezeroekin topa egin dute.

Estitxu Zabala

2015/09/22

Bezeroek eta langileek elkarrekin edan dute xanpaina. (Argazkia: Estitxu Zabala)

San Martin merkataritza-guneak 10 urte bete ditu aste honetan. Urtebetetzea ospatzeko, hainbat jarduera antolatu dituzte, eta gaur eguerdian, elkarrekin topa egin dute bertaratutakoek. Izan ere, xanpain kopak banatu dituzte bertako langileek, bezeroen artean, erosketak egiten ari ziren bitartean. Merkatuan, Fnac-en zein tabernetan ikus zitezkeen bisitariak xanpain kopak eskuetan hartuta paseatzen. Gainera, merkatari batzuek bertako produktuekin egindako mokadutxoak ere banatu dizkiete erosleei. Bihar, asteazkena, auto bat zozkatuko dute eta ostegunean, berriz, gastropote berezia egingo dute. Asteari, gainera, bukaera musikala emango diote. Zehazki, ostiralean, Basic (18:00), Smoke Idols (19:00) eta Señores (20:15) taldeak zuzenean arituko dira bertan.

Aspaldiko merkatua

Odon Elorza alkateak inauguratu zuen San Martin merkataritza-gune berria, duela 10 urte. Zehazki, 2005eko irailaren 21ean zabaldu zituen ateak hiriaren erdiguneko saltoki guneak, 1884ko eraikin historiko zaharra zegoen toki berean. 1882an, Jose de Goicoa arkitektoak San Martin Merkatuaren proiektua diseinatu eta garatu zuen. Merkatua hazi egin zen urteak igaro ahala, eta 2003an Donostiako Udalak merkatu zaharra berri batengatik ordezkatzea adostu zuen. Bi urteko lanen ostean, San Martin merkatu berria sortu zuten. Merkatuaz gain, merkataritza gune ere bilakatu zuten denda ugari irekiz, tartean Inditex taldeko hainbat denda. Iaz, eraikinaren zati handi bat eskuratu ondoren, Zara erraldoia egin zuen.