Administrazio kontseiluak lan poltsan sartzeko baldintza berriak onartu ditu.
Dbus-eko autobus bat geltokira iristen. (Argazkia: Lide Ferreira)
EAJ, PSE-EE, PP, Irabazi Donostia eta UGT sindikatuaren aldeko botoen bidez, Dbuseko gidariei euskara eskakizuna jaistea onartu du gaur Dbuseko Administrazio Kontseiluak. Bilduk aurkako botoa eman du, eta egoera “larria” dela salatu du gainera.
Autobus gidarien lan poltsarako
hautaketa prozesua etenda dago. Izan ere, aurreko legealdian Dbuseko administrazio kontseiluak
euskara ezagutza puntuagarria izatetik, derrigorrezkoa izatera aldatzea adostu zuen. Baina UGT sindikatuak auzitara jo zuen, eta EAEko Lan Arloko Justizia Auzitegi Nagusiak Dbuseko gidariei euskararen ezagutza eskatzea ez zela bidezkoa erabaki zuen, sindikatuari arrazoi emanez. Bilduren gobernuak errekurtsoa jarri zion erabakiari. Oraindik ez da auzia argitu, ez baitute epairik jaso, baina hizkuntza eskakizunen inguruko
akordio bat lortu dute EAJk eta UGT sindikatuak. Dbuseko administrazio kontseiluak gaur berretsi du akordio hori, eta eskakizun berriak zehaztu dituzte.
Hala, EH Bilduk jakinarazi duenez, akordio honen ondorioz,
gidari berrien %40ari ez zaio euskaraz jakitea eskatuko. Axier Jaka, Bilduko zinegotziaren arabera, “akordio honek euskal hiztunak gutxiesten ditu eta bigarren hizkuntza bezala tratatzen du euskara”. Hizkuntza eskakizun berriak “hizkuntza eskubideetan eta euskararen normalizazioan atzerapauso larria” direla gaineratu du.
Bereziki jeltzaleen jarrera kritikatu du Bilduk, eta Eusko Jaurlaritzak Eusko Treneko gidariei ahozko zein idatzizko Bigarren Hizkuntz Eskakizuna eskatzen dietela gogorarazi du; “Argi dago EAJk, non eta Donostian, Euskal Herriko hiribururik euskaldunenean, euskararen normalizazioan atzerapausoak ematea erabaki duela”, esan du Jakak.
Egoera aztertu eta hartu daitezkeen neurriak zehaztuko dituztela aurreratu du Bilduk.
Lan poltsa
Administrazio kontseiluak
lau lan poltsa sortzea adostu du; barne langileen lan poltsa bat eta beste hiru gidari berrientzako. Barne langileentzat euskaraz jakitea puntuagarria izango da. Gidari berrien %40ari 1. hizkuntza-eskakizuna (B1 maila) baino maila altuagoa eskatuko zaio; beste %20ari 1. hizkuntza-eskakizuna; gainerako %40ari ez zaio hizkuntza eskakizunik eskatuko.
Irabazi Donostia taldearentzat “ona” da lortutako akordioa. Amaia Martin, bozeramailearen arabera, “erabakia ona da eskaintza publiko batetatik ez delako inor baztertzen, eta euskararen erabilera sustatzeko ere ona da, euskara eskakizunak dituzten lanpostuak gehiago direlako”. Dbuseko gidari berrien hautaketa prozesua berriro abian jartzea ere lortu dutela gaineratu du Martinek.
