Javi Urbano eta Lorea Ayala izan dira Martuteneko txapeldunak

Gipuzkoako Challengea itxi du igandeko lasterketak.

Estitxu Zabala

2015/10/13

Martuteneko kroseko sarituak. (Argazkia: Challenge Gipuzkoa)

Martuteneko 24. Krosa jokatu zuten igandean, auzoko jaien barnean. Challenge Gipuzkoako hamabigarren lasterketa izan zen, lasterketa herrikoien hamahirugarren ekitaldiko azkena. Guztira 85 korrikalari lehiatu ziren, 2014an baino hogeita hamar atleta gehiago, eta Irungo Javi Urbano (21 minutu 56 segundo) eta Martuteneko Lorea Ayala (26:31) izan ziren azkarrenak. Martuteneko lehen gizona, berriz, Juanjo Ugartemendia izan zen (24:44). Partaideek 6’6 kilometroko ibilbidea egin zuten auzoan barrena, eta Urbanoren atzetik, Lezoko Richard Rivera (22:17) eta Berako Gwendal Larque (22:24) sailkatu ziren. Emakumezkoetan, Ayalaren atzetik, Berako Ane Elzaurdia (27.00) eta Susana Ruiz (27.28) izen ziren hurrenak. Sailkapen osoa ikus daiteke Challengearen webgunean.

Challengearen bukaera jaia ospatuko dute

Gipuzkoako Challengearen bukaera jaia azaroaren 26an egingo dute, 19:00etan, Herrera Kirol Elkartearen egoitzan. Bertan, aurtengo hamabi lasterketatik bederatzi edo gehiago jokatu dituztenak sarituko dituzte: Jose Manuel Navarra Garcia (9 lasterketa), Iñigo Echegaray Ezcurra (9 lasterketa), Mari Jose Hernandez Caro (9 lasterketa) Mateo Gonzalez Etxarri (9 lasterketa), Victor Madejon (10 lasterketa), Emiliano Martin Moro (10 lasterketa), Jexux Orbegozo Ibarguren (10 lasterketa), Pedro Seco Pilar (10 lasterketa), Iñigo Tumas Legorburu (10 lasterketa) eta Ander Jaka Garcia (12 lasterketa).