Antiguako Villa Alegria gaztegunea. (Argazkia: Nagore Koch)
Asteartetan egin ohi duen moduan, Eneko Goia alkateak Tokiko Gobernu Batzordean hartutako erabakien berri eman du.
Batetik,
Antiguako Txantxarreka edo Villa Alegria gaztegunea bertako gazte elkarteari uzteko
hitzarmena luzatzea erabaki dute, baina oraingoan baldintza batzuk jarri dituzte. Alkatearen arabera, hainbat auzotarren kexak jaso dituzte gaztetxeko ordutegi eta zaraten inguruan. Hortaz, soinuen ordenantza aplikatzea erabaki dute, eta hemendik aurrera
ordutegi zehatz bat bete beharko dute Villa Alegriako erabiltzaileek.
Hala, igandetik ostegunera 22:00etaraino erabili ahal izango dute eraikina; ostiraletan, larunbatetan eta jai egun bezperetan 23:00etaraino. Egun berezietan ordutegia luzatzeko aukera izango dute, aurrez udalari baimena eskatuta, betiere.
Argiteria
Bestalde, energia eraginkortasuna sustatzeko
argiteria aldatzea erabaki dute hiriko hainbat kaletan. Horretarako 10 proiektu garatuko dituzte, Gipuzkoa plaza, Ategorrieta edo Txaparrenen, esaterako. Aldaketek 120.000 euroko kostua izango dute udalarentzat, eta beste %30 EVE-ri eskatzea adostu dute.
Azkenik, zuzendaritzetako izendapenekin jarraituz,
Ana Salustiano Snoz izendatu dute Giza Baliabideetako zuzendari gisa.
